GIPAHIBALO sa Davao City Police Office (DCPO) nga mopasang-at kini og daghang mga kasong kriminal batok sa drayber nga nisulay og ligis sa traffic enforcer niadtong Enero 11, 2024.
Gisulti ni Police Captain Hazel Tuazon, tigpamaba sa DCPO, nga ang drayber mag-atubang og mga kaso nga "reckless driving, reckless imprudence resulting in physical injury," ug "disobedience of a person in authority."
“Fil-an gyud siya og kaso sa reckless driving, reckless imprudence resulting in physical injury, and disobedience of person in authority or pagsukol sa atoang CTTMO,” matud niya atol sa Davao Peace and Security Press Corps niadtong Enero 15, 2025, sa The Royal Mandaya Hotel.
Dugang pa ni Tuazon nga ang Land Transportation Office-Davao Region (LTO) mohimo og lahi nga imbestigasyon sa drayber ug naglaum nga marebukar ang driver's license niini.
Kahinumdoman nga nahitabo ang insidente niadtong Sabado, Enero 11, 2025, duol sa Gaisano Mall Bajada, sa dihang usa ka traffic enforcer giingong gituyo nga banggaan sa drayber.
Ang insidente nakuhaan og video ug unya gi-upload sa online, kon diin nakadawat kini og halapad nga pagtagad ug reaksiyon.
Niatubang ang drayber sa CTTMO ug ni-esplikar sa iyang bahin sa istorya niadtong Enero 14, 2025.
Sa samang adlaw, nisurender sab siya ngadto sa DCPO.
Nitambong sab ang drayber og "clarificatory hearing" uban ang CTTMO, LTO, ug sa Traffic Enforcement Unit (TEU).
Atol sa pagdungog, ang drayber ug ang traffic enforcer nagpresentar sa ilang mga bersiyon sa insidente.
Gitug-an ni CTTMO Head Dionisio Abude ngadto sa SunStar Davao nga mosumite sila og mga dokumento, apil ang medical certificate, police blotter, ug uban pang rekord, ug CCTV footage, ngadto sa LTO-Davao.
Kini nga mga butang makatabang sa pagdeterminar sa haum nga mga kaso ug silot nga atubangon sa drayber. (Rojean Grace G. Patumbon)