Drayber sa uso-uso gipriso; 18 ka pasahero nangaangol

Drayber sa uso-uso gipriso; 18 ka pasahero nangaangol
DCPO

GIKUSTODIYA karon sa kapulisan sa Baliok Police Station sa Davao City Police Office (DCPO) ang drayber sa uso-uso nga Public Utility Jeepney (PUJ) human nga nalambigit ang gimaneho niining dyip sa disgrasya kagahapon sa buntag, Hunyo 27, 2024, sa McArthur Highway, Barangay Bago Aplaya, Talomo District, Davao City.

Sumala ni DCPO spokesperson Police Captain Hazel Tuazon nga kasong Reckless Imprudence Resulting To Damage To Property ang ipasaka batok sa drayber sa uso-uso nga dyip dunay plaka numero LAA 9421 nga gimaneho ni alyas Mario.

Subay sa inisyal nga report sa DCPO, giingong kusog ang dagan sa color violet nga uso-uso nga biyahe gikan Toril padulong downtown area ug nabangga kini ngadto sa likod sa laing pampasaherong jeep sa maong lugar.

Tungod sa hitabo, maayong pagkaguba likod nga bahin sa gibanggaan ug ang atubangan nga bahin sa uso-uso nga PUJ.

Nangaangol sab ang tulo ka pasahero sa gibanggaan nga dyip ug laing 15 ka mga pasahero sa uso-uso.

Dali sab dayon nga miabot ang Central 911 ambulance paramedics team ug gilayong giatiman ang kahimtang sa mga pasahero.

“Reckless Imprudence Resulting To Damage To Property atong ipasaka nga kaso sa driver aning uso-uso nga mibangga, pero puwede sab siya kasohan sa mga victims sa mga passengers og physical injury,” ingon ni Capt. Tuazon nga nahinabi sa SuperBalita Davao Huwebes.

Kahinumdoman nga sa miaging mga katuigan uso-uso gihapon nga PUJ ang nalambigit sa daghang mga bangga sa McArthur Highway diin sagad sa maong mga PUJ dunay rota nga Toril - Roxas Avenue.

Gumikan sa hitabo, mahagit karon ang buhatan sa City Transport and Traffic Management Office (CTTMO) nga modugang og personahe nga ilang ibutang sa dapit nga maoy matahasan sa mga speed gun nga kabahin sa ordinansa nga speed limit sa siyudad sa Davao.. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph