NAGMALAMPUSON ang Davao City Police Office (DCPO) sa pagdakop sa 47-anyos nga drayber human nakalapas sa Tariff and Customs Code of the Philippines ug Republic Act 10643.
Ang suspek, giila nga si alyas Ervin, nadakpan nga nagkarga og 200 ka kahon sa D&G cigarettes nga nagkantidad og gibana-bana nga P2,500,000.
Nahitabo ang pagdakop niadtong Abril 6, 2025, sa dihang ang puti nga Isuzu 14-wheeler prime mover ni Ervin, nagbitad og 40-footer container van, gipahunong atol sa routine police checkpoint sa Libby Road sa Barangay Bago Gallera, Davao City.
Sa dihang gisusi, nadiskobre sa mga awtoridad ang gitago nga kontrabandong mga sigarilyo.
Sumala sa taho nga gipresentar sa mga awtoridad, napakyas ang suspek sa pagpakita og bisan unsang dokumento alang sa maong butang, hinungdan nga gidakop siya.
Dugang pa sa 200 ka kahon sa ismagol nga sigarilyo, ang behikulo mismo, uban ang mga karga niini, gisakmit usab sa mga awtoridad.
Kasamtangan ang DCPO nakigkoordinar na uban ang Bureau of Customs (BOC) alang sa dugang imbestigasyon ug paggunit sa kaso.
Samtang ang suspek nagpabilin sa kustodiya sa pulis aron nga atubangon ang iyang mga kaso. (David Ezra Francisquete)