Drone sa vlogger gikumpiska sa pulis

GIPAHIBALO sa mga sakop sa San Pedro Police Station sa mga regulasyon sa ordinansa sa Siyudad sa Davao labot pagpalupad og drone ang usa ka vlogger nga taga Valencia City, Bukidnon.

Kini human nga ang drone niini gi-turnover sa kapulisan sa San Pedro dihang na-post sa social media kay mitugpa ang drone sa usa ka boarding house sa Palma Gil Street, Barangay 34-D, Poblacion ning siyudad.

Nasayran nga gikumpiska sa mga sakop sa San Pedro PNP ang drone dihang nasayran nga gipalupad nga walay permit.

Sumala ni Police Major Marvin Hugos, ang hepe sa San Pedro PNP nga daling mihimo og pagsusi ang mga pulis ug gikustodiya ang maong drone nga usa ka DJI Spark Fly type drone nga dunay 32GB SanDisk ultra micro SD memory card.

Gilayong mipatim-aw ang tag-iya niini nga nailhang si alyas Negger, 27-anyos, school clerk ug usa ka vlogger kinsa temporaryong nagpuyo sa 15th floor sa usa ka condominium ning Dakbayan sa Davao.

Depensa sa vlogger nga wala siya nasayod nga bawal ang pagpalupad og drone sa Siyudad sa Davao labi na og walay igong permit base sa Drone Regulation Ordinance sa Davao City. (JPC)