Drug dealer natiklo; P6.8-M shabu sakmit

COTABATO CITY -- Kaso sa kalapasan sa Republic Act 9165 o Comprehensive Dangerous Drug of 2002 ang gipasaka batok sa drug dealer nga nadakpan alas 5 sa hapon, Hulyo 23, 2024, sa Dau Odin Sinsuat, probinsiya sa Maguindanao del Norte.

Giila ang suspek nga si Morsalon Tantong, 30-anyos, minyo ug nagpuyo sa Barangay Dalapang, Labangan, Zamboanga del Sur.

Sumala kang Maguindanao del Norte Police Provincial Office Director Colonel Salman Sapal nga nagpahigayon og buy-bust ang kapulisan sa Barangay Awang, Datu Odin Sinsuat sa maong probinsiya.

Sa dihang gitunol na sa suspek ang ilegal nga druga sa undercover agent sa kapulisan, giambakan gilayon ug giposasan.

Nakuha sa kapulisan nga gipangulohan ni Lieutenant Colonel Esmael Madin ug Lieutenant Colonel Samuel Subsuban gikan sa suspek ang usa ka kilo nga shabu nga nagkantidad og P6.8 milyones.

Narekober sab ang kotse nga gisakyan sa suspek ug ubang personal nga kagamitan.

Gibalhog na ang drug dealer sa prisohan sa kapulisan sa Datu Odin Sinsuat Municipal Police Station samtang gihulat ang mando gikan sa korte. (EEF)