COTABATO CITY -- Pasakaan og kaso nga kalapasan sa Republic Act 9165 o Comprehensive Dangerous Drug Act of 2002 ang drug dealer nga nadakpan human masakmitan og mobalor sa P1.7 milyon nga shabu alas 12:15 sa udto, Dominggo, Abril 6, 2025, sa Datu Odin Sinsuat, Maguindanao del Norte.
Giila ang suspek nga si Mel Anok Ibrahim, 38-anyos, minyo ug nagpuyo sa Barangay Dalican, Datu Odin Sinsuat, Maguindanao del Norte.
Gibutyag ni Sultan Kudarat Chief of Police, Police Lieutenant Colonel Esmael Madin nga nagpahigayon sila og buy-bust operation, uban ang mga sakop sa Datu Odin Sinsuat Municipal Police Station, Provincial Drug Enforcement Unit, ug mga opisyales sa Barangay Dalican.
Atol nga gitunol ni Ibrahim ang shabu ngadto sa nagpakaaron-ingnon nga buyer, dali siyang gisikop.
Narekober gikan sa suspek ang 250 gramos nga shabu nga nagkantidad og P1.7 milyones.
Gawas sa shabu, nakumpiska sab ang mga non-drug evidence ug buy-bust money nga P300,000.
Balhog na ang suspek sa prisohan sa Sultan Kudarat MPS ug naghulat sa mando sa korte. (Edgar E. Fuerzas)