MIRESULTA sa pinusilay ang pagsilbi og warrant of arrest sa otoridad didto sa Barangay Semba, Datu Odin Sinsuat, Maguindanao del Norte kay misukol ang mga suspek, alas 12:15 sa udto, Marso 21, 2024.
Napatay sa hitabo si Razul Adzal, 32 anyos, taga Barangay Mother Tamontaka, Cotabato City.
Samtang naangol ang usa ka Ali Mama, 57 anyos, nga taga Barangay Semba, Datu Odin Sinsuat, Maguindanao Del Norte.
Gibutyag ni Police Lieutenant Colonel Sahibon Mamantal, ang hepe sa Datu Odin Sinsuat Police, nga target sa operasyon si Samsudin Usman alyas Sammy o Krega nga may kasong murder ug gitudlong nagpaluyo sa drug den.
Nasayran nga samtang pasulod pa lang ang otoridad sa dapit, gipaulanan na sila og bala sa tropa ni Usman.
Mga napatay ug nasamdan sa insidente mao ang mga sakop ni Usman nga dali sab kaayong nakasibat.
Sa pikas bahin, nakuha gikan sa mga suspek ang usa ka Ingram pistol, caliber .38 revolver, mga bala ug mga shabu. Gihikay na ang kasong atubangon sa dinakpan samtang gipangita ang ubang nakasibat sa pagronda. (EEF)