MATI CITY, Davao Oriental -- Napuhag ang usa ka giingong drug den ug nasikop ang upat ka indibiduwal sa gihimong buy-bust sa mga awtoridad sa Purok Proper, Barangay Macambol, alas 10:30 sa gabii sa niaging adlaw.
Gipasiugdahan ang operasyon sa hiniusang puwersa sa Philippine Drug Enforcement Agency (PDEA) Davao Oriental Provincial Office, Regional Office 11, Police Regional Office 11-Regional Intelligence Unit, 2nd Davao Oriental Provincial Mobile Force Company, Drug Enforcement Unit sa Davao Oriental Police Provincial Office, ug Mati City Police Station.
Nasikop ang giingong tag-iya sa drug den nga nailhan lang sa alyas nga Sally, 48-anyos, human kini namaligya og usa ka pakite nga adunay sulod nga gidudahang shabu ngadto sa usa ka undercover agent.
Apil usab sa nasikop mao si Rico, giingong trabahante sa drug den, ug duha pa ka bisita nga giila sa alyas nga Joseph ug Ruben.
Nakumpiska usab sa operasyon ang lima ka pakite sa gidudahang shabu nga gitimbang og 12 ka gramos, mga drug paraphernalia, ug ang marked money nga gigamit sa transaksiyon.
Mga suspetsado mag-atubang og kasong paglapas sa Republic Act 9165 o ang Comprehensive Dangerous Drugs Act of 2002.
Sa pikas bahin, nadakpan sab sa Coast Guard Sub-Station sa Kilometro 11 sakop sa Barangay Panacan, Davao City ang tulo ka indibiduwal gumikan sa illegal fishing nga gihimo gamit ang gidili nga compressor sa kadagatan sakop sa Barangay Panacan, Hulyo 24, 2025.
Base sa Section 4, 10 sa Executive Order 36, Series of 2012 sa Davao City, ginadili ang paggamit og compressor sa pagpangisda tungod sa kadaut niini sa dagat ug sa marine life.
Ang mga nahisgutan kustodiya sa Coast Guard ug gi-inventory ang ilang mga gamit lakip ang motor banca nga gigamit.
Pinaagi sa koordinasyon sa City Fisheries Division, gitiketan ang tag-iya sa sakayan ug gipa-release ang mga indibiduwal ug ang motor banca human mosunod sa mga gipangayo nga rekisitos.
Gipahimangnoan usab sa Coast Guard Station Davao ang publiko nga likayan ang paggamit sa compressor ug uban pang gidiling aktibong fishing gears nga supak sa EO 36, Series of 2012 ug sa Republic Act 10654 o Philippine Fisheries Code.
Nagpadayon ang lokal nga awtoridad sa istriktong pagpahimangno aron maprotektahan ang kadagatan ug mapreserba ang sustenableng tinubdan sa isda sa baybayon sa Davao City. (Jeepy P. Compio)