GITUGTAN sa Commission on Higher Education-Davao Region (Ched-Davao) ang dugang 250 student slots alang sa Samal Island City College (SICC).
Sa courtesy call kang Island Garden City of Samal Mayor Lemuel T. Reyes, Lunes, Hulyo 14, 2025, gihatag ni Ched-Davao Director Dr. Maricar R. Casquejo ang pagtugot alang sa dugang student slots sa SICC.
Nagpadayag sab ang Ched sa ilang suporta alang sa nagpadayon nga pagkonstrak og bag-ong mga lawak aron nga makaakomodar sa nagkadaghan nga ihap sa mga enrollees sa institusyon.
Atol sa panagtigum, gipresentar sa Ched ang daghang mga rekomendasyon aron sa pagpalambo sa SICC, apil ang pagpalambo sa talagsaong academic program nga nahisubay sa kailhanan sa Island Garden City of Samal (Igacos).
Subling gipasalig ni Reyes ang komitment sa lokal nga panggamhanan aron nga matubag ang standards sa Ched ug iyang mga rekisitos aron nga mas molambo pa ang SICC, usa na niini ang mga plano sa pag-aplay og Level 1 accreditation.
Sayo niadtong Hulyo 12, 2025, nagpagawas og pahayag ang SICC bahin sa ihap sa mga tinun-an sa first-year nga mosulod sa academic year 2025–2026.
Nagpahibalo ang tulunghaan nga magpasulod lang sila og 250 ka tinun-an subay sa kasamtangang kapasidad niini.
Esplikar sa SICC nga ang hukom nga limitahan ang admisyon aron nga mamentinar ang gidaghanon sa student population sa 3,700, nga maoy kasamtangang nga kapasidad sa kolehiyon. Nangayo og pagsabot ang tulunghaan ug nipasalig nga pabilin silang nikomitar sa paghatag og "access to affordable and quality education."
“Rest assured that we are working closely with the local government unit of Igacos to significantly expand our carrying capacity and accommodate more students in the future. In fact, there are ongoing infrastructure projects in SICC that will surely increase our carrying capacity,” pasalig sa SICC.
Sa kasamtangan, ang SICC niprodyus na og kinatibuk-ang 663 graduates sukad sa ilang unang commencement exercises niadtong 2023.
Opisyal nga na-establisar ang SICC niadtong 2018 pinaagi sa City Ordinance 2018-296 ug gikompirma sa Sangguniang Panlalawigan sa Davao del Norte pinaagi sa Resolution 2018-775. (Rojean Grace G. Patumbon)