NAGPADAYAG sa iyang pagkomitar si Vice President Sara Duterte nga morespeto kon unsa man ang hukom sa Korte Suprema (Supreme Court) bahin sa nagpadayon nga petisyon nga ihunong ang konstruksiyon sa P23-bilyon nga Samal Island-Davao City Connector (SIDC) bridge project.
Namulong ngadto sa mga tigbalita niadtong Hunyo 27, 2025, human niatender sa inagurasyon sa bag-ong napili nga mga opisyales sa Island Garden City of Samal (Igacos) City Hall grounds, giila ni Duterte ang nagkadako nga oposisyon gikan sa environmental groups apan iyang gipahimug-atan ang ekonomikanhon nga benepisyo nga dad-on sa tulay.
“Well, depende na yan kung ano ang desisyon ng Supreme Court pero sana ay makita ng lahat na napakalaki ng tulong ng Davao Samal Bridge sa ekonomiya ng Davao at Samal," sulti niya.
Ang proyekto, labing nailhan sab isip Davao-Samal Bridge, kasamtangan nga gipaubos og pagsusi human nipasang-at ang environmental groups og 200-panid nga petisyon ngadto sa SC niadtong Abril.
Ang petisyon nagtinguha og "writ of kalikasan" ug "temporary environmental protection order," nagtumbok sa mga posibleng di na mahulipan nga danyos ngadto sa critical coral ecosystems, apil na ang Paradise Reef ug ang Hizon Marine Protected Area.
Mga petisyoner, pangulohan sa Ecoteneo, Interfacing Development Interventions for Sustainability (Idis), Dyesabel Philippines, ug ang Sustainable Davao Movement, nagpahimangno nga ang proyekto makaguba sa marine life ug panginabuhian sa mga komunidad sa kabaybayonan nga nag-agad niining mga rekursos.
Apan ang Department of Public Works and Highways-Davao Region (DPWH-Davao) nibarog nga ang konstruksiyon pabilin nga nakatakda, kon diin target nga mahuman sa 2027.
Sa niaging pahayag ni DPWH-Davao spokesperson Dean Ortiz, nagkanayon nga bisan og pabilin ang mga isyu bahin sa "right-of-way", wala kini makaapekto sa kinatibuk-ang gilatid nga dagan sa panahon.
Ang 3.9-kilometros, upat ka lane cable-stayed bridge magkonektar sa Barangay Limao sa Igacos ngadto sa Davao City tabok sa Pakiputan Strait, nga nagtinguha nga mapalambo ang "connectivity and economic activity" tali sa duha ka mga lugar. (David Ezra Francisquete)