HANGTUD karon anaa pa ang kasakit nga gibati sa mga dumadapig sa atong pinalangga nga kanhi Pangulong Rodrigo R. Duterte kinsa gitiner karon sa International Criminal Court (ICC) didto sa The Hague, Netherlands human masikop didto sa Ninoy Aquino International Airport (NAIA) niadtong Marso 11, 2025.
Human siya gidala sa kapulisan sa Villamor Air Base hangtud karon, nagpadayon ang protesta sa katawhang Pilipino batok sa gobyerno nga mitahan sa kanhi pangulo sa langyaw nga korte.
Dili nako mabasol ang mga Pilipino nga mibati og kaluoy sa kanhi presidente ug kasuko ngadto sa mga tawo nga maoy hinungdan sa iyang pagkasikop tungod sa naghinobra nilang pagmahal sa kanhi pangulo.
Kung makapatay pa lang ang mga mahait nga pulong, aw, gipangadyean na tingali ang presidente sa nasud ug iyang mga alipores.
Kini ang atong makita nga reaksiyon sa mga netizens sa social media nga nagpadayag sa ilang kapungot sa administrasyon ni Pangulong Ferdinand R. Marcos, Jr.
Tungod niini, usa ako sa mga nanawagan sa among programa sa DXGO Aksyon Radyo (Aksyon Report Morning Edition) nga di na nato sugnoran pa ang nagdilaab nga kapungot sa katawhan.
Sa maong programa, kami ni Aksyon Jhun Suter nanawagan sa katawahan nga likayan na ang pagpaskin sa mga peke nga impormasyon nga maoy mosugnod sa kagubot.
Among giawhag ang katawan nga magmakalmahon ug labaw sa tanan di mobuhi og mga pulong nga makapaalsa katawhan batok sa gobyerno aron di mosamot ang kasamok. Kay kung ato kining himuon, posible pa nga mag-atubang kita og kaso nga inciting to sedition.
Sanglit nagtinguha man lagi kami nga magmalinawon kita, angay gayud nato nga hinuklogan ang mensahe ni Arsobispo Romulo Valles nga nagdala og usa ka mahinungdanong panawagan sa katawhan, ilabi na sa mga Kristohanong katilingban nga maghiusa sa pagsabot, pagpakabana, ug pagbarog alang sa hustisya nga puno sa integridad.
Tinuod nga daghan ang nasakitan, nagdumot, ug nibati og kabalaka sa maong panghitabo. Apan sa kasamtangan, ang simbahan naghatag og giya nga puno sa gugma ug katarong.
Dili kini ang panahon sa pagpanglalis ug pagpanghimaraot, kondili panahon sa pag-ampo, panaghiusa, ug pagsalig sa Ginoo. Isip usa ka nasud, angay kitang mangita og kaayohan pinaagi sa maayong panghuna-huna, matuod nga proseso sa balaod, ug espirituhanong paggiya.
Nagtan-aw kita sa Simbahan isip giya sa moral ug espirituhanong panginahanglan sanglit ang misyon sa simbahan mao ang pag-awhag sa tanan nga ipabarog ang kamatuoran, panalipdan ang dignidad sa katawhan, ug ipromotar ang kaayohan sa tanan.
Panahon na nga atong ipakita ang atong buhing pagtuo pinaagi sa pagbaton og kaisog sa pagbuhat sa insakto, pagpili sa hustisya, pag-amuma sa mga dinaug-daog, ug pagdawat sa katungod sa tanan nga makabaton og patas nga proseso sa balaod.
Ang panawagan sa arsobispo usa ka tawag sa kalinaw, katarungan, ug pagkamatarong. Uyon ako sa iyang panawagan nga atong isalikway ang kapungot ug pagkabahin-bahin, pilion ang dalan sa maayong dayalogo, ug panag-uli gikan mga panagbangi sa kaayohan sa katawhang Pilipino.