Dura: Kinahanglan sa publiko ang transparency sa Bicam report

Ratsada
Alger Dura
Alger P. Dura
Published on: 

ANG kontrobersiya bahin sa blangko nga mga seksiyon sa Bicameral Conference Committee report alang sa 2025 General Appropriations Act (GAA) nagpakita sa usa ka kritikal nga isyu bahin sa transparency ug accountability sa proseso sa pag-aproba sa badyet sa nasud.

Ang pahayag ni kanhi DBM Secretary Wendel Avisado nga kinahanglan nga tin-awon ang mga blangko nga seksiyon aron masabtan sa publiko kung unsa gyud ang nahitabo, naghatag og timailhan sa pagkinahanglan og mas klaro ug limpyo nga proseso sa lehislasyon.

Ang pag-aproba ug pagpirma sa usa ka Bicameral Report nga adunay 28 ka blangko nga items dili lamang usa ka operational lapse, apan usa usab ka potensiyal nga paglapas sa prinsipyo sa "public accountability."

Ang mga miyembro sa Kongreso adunay responsibilidad sa pagseguro nga ang tanang detalye sa maong report klaro ug sakto una kini iratipika.

Kini nga isyu nagpasidaan bahin sa kakulang sa kahingpitan sa pag-review sa kritikal nga mga dokumento.

Si Representative Isidro Ungab nagtumbok sa usa ka lehitimong pangutana: "Kinsa ang nagpuno sa mga blangko?"

Kon ang maong aksiyon gihimo sa usa ka partido gawas sa Kongreso, kini mahimong usurpation sa gahom sa pag-aprobar og pundo, nga sakop lamang sa lehislatura.

Ang pagsuporta sa iyang plano nga dad-on kini sa Supreme Court maoy angayan aron mahatagan og klaro nga interpretasyon ang maong isyu.

Ang GAA isip "enrolled bill" kinahanglan magrepresentar sa giuyonan nga bersiyon sa Senado ug Kongreso.

Apan ang kakulang sa klaro sa proseso sa pag-aproba sa Bicameral Report nagbukas sa posibilidad nga adunay nagkahiusa nga mga kalapasan, nga makapaluya sa pagsalig sa publiko sa mga institusyon sa gobyerno.

Ang gisulti ni Presidente Ferdinand Marcos Jr. nga "walay discrepancies" sa GAA, apan wa motumbok sa Bicameral Report, usa ka timaan nga adunay kakulang sa pagtubag sa nag-unang isyu.

Ang pagbutyag sa mga detalye sa DBM website usa ka positibo nga lakang, apan dili kini igo aron mapasabot ang mga butang nga wala ma-eksplikar.

Hinuon, gipasabot ni House of Representatives Committee on Appropriations acting chairperson Stella Quimbo nga adunay blangko nga aytem sa bicameral report sa P6.325 trillion national budget sa tuig 2025, apan ang pundo niini nga mga aytem gihisgutan sa wala pa korehian ug gipirmahan ang report.

Kinahanglan nga mapalig-on ang mga mekanismo aron maseguro nga ang tanang mga dokumento nga may kalabutan sa pundo sa gobyerno klaro, kompleto, ug masusi pag-ayo.

Ang transparency dili lang usa ka panginahanglanon, apan usa ka barometro sa pagkamatarong sa gobyerno.

Sa katapusan, ang isyu sa blangko nga mga seksiyon sa Bicameral Report magpabiling usa ka leksiyon sa panginahanglan sa mas hayag nga proseso sa pagdumala sa pundo sa nasud.

Kini nga kontrobersiya magdasig unta sa tanang sektor sa gobyerno nga maghimo og mga lakang aron malikayan ang susamang problema sa umaabot nga panahon.

Trending

No stories found.

Just in

No stories found.

Branded Content

No stories found.

Videos

No stories found.
SunStar Publishing Inc.
www.sunstar.com.ph