ANG pagdakop kang kanhi Pangulong Rodrigo Duterte sa Ninoy Aquino International Airport Martes, Marso 11, 2025, pinaagi sa giingon nga warrant nga gipagula sa International Criminal Court (ICC) usa ka dakong kasaysayan sa Pilipinas.
Kini nagdala og nagkalain-laing pagbati sa katawhan — kasubo alang sa mga Dabawenyo nga naglantaw kaniya isip lider nga maayo nga nagpadagan sa siyudad ug tibuok nasud, apan kalipay alang sa mga pamilya sa liboan nga biktima sa iyang duguong giyera kontra druga.
Alang sa daghang Dabawenyo, si Duterte usa ka amahan sa siyudad, kinsa nanguna sa pagpauswag ug pagmentinar sa kahapsay ug kalinaw sa Siyudad sa Davao nga atong natagamtaman karon.
Bisan pa sa iyang inisog nga pamaagi sa pagdumala sa siyudad ug nasud, daghang mga netizens ang nakadayeg sa iyang pagkamatinud-anon sa pagserbisyo ug buot siyang panalipdan gikan sa mga moaresto kaniya.
Apan alang sa mga pamilya sa liboan nga biktima sa war on drugs, kini usa ka adlaw nga nagtimaan sa ilang kadaugan ug paglaum nga makab-ot ang hustisya.
Suma sa mga pamilya, sa dugay nga nga panahon, ang ilang mga silingan, igsuon, bana, ug anak napapas nga walay klarong due process.
Alang nila, ang pagdakop kang Duterte nagpakita nga bisan ang labing gamhanan nga opisyal sa nasud dili makaikyas sa balaod.
Ang kaguol sa Dabawenyo ug ang kasakit sa pamilya sa mga biktima usa ka pamatuod nga ang kasaysayan walay pinalabi.
Dihang nabalitaan nako ang pag-aresto sa atong pinalanggga nga kanhi Presidente Duterte, nibati usab ako og kaluoy niya, kinsa nagkanayon nga iya lamang kadtong gihimo alang sa kaayohan sa iyang pinalangga nga katawhan.
Apan bisan pa man niini, dili angay nga magmugna og kagubot ang mga dumadapig sa kanhi pangulo tungod kay mosamot kasamok ang atong nasud ug maapektohan kitang mga Pilipino.
Mahimong mosaka ang tensyon sa nasud tungod sa mga protesta sa mga loyalista sa pangulo nga nasuko ug mga pamilya sa mga biktima nga nagtinguha nga makuha ang hustisya.
Hinaut nga dili kini mahitabo sa atong nasud!