GIPANEGURO sa City Agriculturist’s Office (Cagro) nga dunay igong prutas nga durian karong panahon sa Kadayawan, hinuon di gyud sama kabuhong sa niaging tuig.
Si Fe Oguio, fruit and cacao focal person sa Cagro, nagkanayon nga ang durian di gyud mobaha sa merkado, apan gilauman nga molahutay hangtud sa Marso 2026.
Iyang gi-esplikar nga tungod sa kanunay nga pag-ulan karong tuiga, mga prutas nga durian wala makapamunga og igo alang panahon sa tingpamupo karong Agosto.
“Of course, kani atoang climate change mao gyud na siya ang culprit because of the high rainfall incidence nga dili pud, wala ta'y control, so isa na siya nga cause kay ang atua man gyud tanum masakit siya sa taas nga rainfall,” esplikar niya atol sa ISpeak media forum, Huwebes, Huly 31, 2025, sa City Mayor’s Office (CMO).
Dugang ni Oguio nga ilang gialuman nga ang panahon sa pagpamupo og durian magsugod sa Oktubre.
Tungod niini, ang presyo sa prutas gilauman nga motaas tungod sa "supply and demand."
Iyang gitin-aw nga uban sa 18 exporters sa durian, ang presyo gilauman nga mosulbong ilabi tungod sa "demand" atol sa panahon sa Kadayawan.
Ang "farmgate price" sa Puyat variety kasamtangan naa sa P100 matag kilo, samtang ang ubang mga klase nagsugod sa P60 hangtud P80.
Gibutyag sab niya nga ang siyudad nagkonsidera sa pagpanguha og durian gikan sa Kidapawan City por in kaso kung wa gyuy igong suplay alang sa panahon sa festival.
Sumala sa Cagro, mga 40 tonelada nga durian ang gi-eksport gikan Enero hangtud Pebrero karong tuiga.
Ang siyudad dunay 3,000 ka ektarya sa plantasyon sa durian, kon diin 2,000 ektarya niini produktibo.
Samtang ang ubang mga prutas sama sa mangosteen, rambutan, ug lanzones gilauman nga mahimo nang pupuon sa Oktubre, dili Agosto.
Gitin-aw ni Oguio nga inay sa naandan nga tingpamupo sa maong mga prutas panahon sa Kadayawan malingaw ang mga Dabawenyo, apan mahimong makapalit na og mga prutas nga naa na karon sa merkado sama sa mangga, santol, guyabano, saging, nangka, ug marang. (Rojean Grace G. Patumbon)