SUBLING mahadlok ang mga giingong drug pushers ug drug users sa Davao City sa subling pagbalik ni kanhi Presidente Rodrigo R. Duterte isip amahan sa dakbayan sa Davao.
Atol sa press conference sa usa ka hotel sa dalang Magallanes sa siyudad sa Davao, Sabado sa gabii, Oktubre 5, 2024, gikompirma sa kanhi pangulo nga siya mopapili pag-usab isip mayor sa dakbayan sa 2025 midterm elections.
“Kung mobalik nako sa pagka-mayor, kamong mga durugista nga naa sa Davao City, panglayas namo, kay kung dili, mamatay gyud mo," ingon sa kanhi pangulo.
Dugang pa niya nga si Mayor Sebastian "Baste" Duterte ang iyang himuong Vice Mayor.
Gihimug-atan sab sa kanhi pangulo nga dili na unta siya subling mosulod sa politika kay moretiro na siya, apan kung unsay gusto sa kadaghanang Dabawenyo, mao suma pa ang iyang tumanon.
“Ako mo-retire nako, tapos na ako, retired na, ehh ano pa ba ang gusto ninyo?… pero kung ano ang gusto ninyo, sige susundin ko,” ingon ni FPRRD.
Wala gikabutyag ni FPRRD kung kanus-a siya mo-file og certificate of candidacy (COC), apan mo-file kuno siya sa dili pa siya molarga sa Kaulohang Manila karong semahana.
“Una ko molarga sa Manila, mo-file ko diri sa Davao City,” ingon ni FPRRD.
Wala sab matarog ang kanhi presidente dihang nahibal-an niini nga duna nay mi-file nga kandidato sa pagka-Mayor nga mao si Bishop Rodolfo Cubos.
“Demokrasya tayo eh, oh mas maayo,” sulti sa kanhi pangulo.
Ugmang adlawa, Oktubre 8, 2024 ang katapusang adlaw sa filing sa COC. (Dexter T. Visitacion)