TATAW kaayo ang paglabaw sa mga Duterte nga nidagan sa managlahi nga mga lokal nga posisyon sa pinakaulahing 2025 Davao City Election Survey nga gilusad sa University of Mindanao (UM)-Institute of Popular Opinion (IPO).
Ang survey, gilusad sa UM-IPO gikan Enero 8 hangtud 28, 2025, gilangkuban sa tulo ka mga distrito uban ang kinatibuk-ang 2,582 rehistradong mga botante.
Mga respondente nga nisalmot sa face-to-face survey, uban sa "margin of error of two percent" ug "confidence level of 95 percent."
Basi sa mga resulta, hugot nagsuporta ang mga Dabawenyo sa mga Dutertes.
Saysenta porsiyento sa mga botante nagsulti nga ilang botohan si kanhi Presidente Rodrigo Duterte alang sa pagka-mayor sa Davao City.
Ug sa samang panahon, 55.7 porsiyento sa mga Dabawenyo nagpadayag nga nipabor alang kang Sebastian “Baste” Duterte sa pagka-bise mayor.
Kini mas taas itandi sa ilang mga kakompetensiya: Karlo Nograles sa pagka-mayor (10 porsiyento) ug Bernie Al-ag sa pagka-bise mayor (14 porsiyento).
Apan gitin-aw sa UM-IPO nga mga tulo sa matag 10 ka Dabawenyos pabilin pang wala makahukom bahin kung kinsa ang ilang botohan alang sa pagka-mayor ug pagka-bise mayor.
Alang sa unang distrito, 54.8 porsiyento sa mga botante nagsulti nga ilang botohan si Paolo Duterte isip maoy representante sa distrito.
Kini mas taas itandi sa iyang mga kontra, Puwersa ng Bayaning Atleta (PBA) Party-list Representative Atty. Margarita "Migs" Nograles, kinsa dunay 16.1 porsiyento.
Bahin sa konseho, ang unang walo ka mga kandidato nga gipaboran sa mga molupyo sa Davao sa District 1 mao si Rodrigo “Rigo” Duterte II, J. Melchor Quitain Jr., Jessica “Cookie” Bonguyan, Radge Nino Ibuyan, Bonz Andre Militar, Atty. Luna Acosta, Pamela “Paneng” Librado, ug Temujin “Tek” Ocampo.
Sa ikaduhang distrito, 41.8 porsiyento nga mga respondente nagsulti nga ilang botaran si Omar Duterte isip ilang representante sa House of Representatives, nga mas doble sa 23.4 porsiyento nga niingong moboto kang Javi Campos.
Alang sa mga konsehal sa ikaduhang distrito, nag-una nga mga kandidato mao sila Danilo “Danny” Dayanghirang, Al Ryan Alejandre, Jonard Dayap, Louie John Bonguyan, Atty. Diosdado Mahipus, Cheche Justol, Doce Apostol, ug Ralph Abella.
Sa ikatulong distrito, 39.6 porsiyento nagpadayag og interes nga moboto kang Isidro Ungab isip ilang representante sa Kongreso, samtang 23.2 porsiyento nagsulti nga moboto kang Nonoy Al-ag.
Ang unang walo ka mga konsehal sa ikatulong distrito mao sila Atty. Bai Hundra Cassandra “Sweet” Advincula, Myrna Dalodo-Ortiz, Rachel Zozobrado, Alberto Ungab, Jopet Baluran, Petite Principe, Enzo Villafuerte, ug Trisha Ann Jasmin Villafuerte.
“A significant number of undecided implied the need for candidates to make know their platforms and plans for Davao City. Perhaps, these undecided would like to know first where these candidates will devote their time and efforts when and if they are elected,” matud sa UM-IPO.
Samtang gikanayon ni Honee B. Carballo, usa ka virtual assistant nga nagpuyo sa Catalunan Grande, ngadto sa SunStar Davao nga ang taas nga grado sa mga Duterte sa Davao nag-ugat gikan sa ilang talagsaon nga kontribusyon sa ekonomiya ug imprastraktura nga kalamboan sa dakbayan.
Matud niya nga ang mga nahimo sa Duterte masubay og balik sa serbisyo sa tigulang nga Duterte.
Puno pa niya nga bisan tuod kung di tanang mga anak ug mga apo milihok sama sa kanhi presidente, nagtuo siya nga ang tigulang nga Duterte mogiya sa mga batan-on. Tungod niini, nisuporta siya kanila nga modagan alang sa mga nagkadaiyang posisyong politikal sa dakbayan.
Bahin sa mga politiko nga gipromotar sa mga Dutertes, sulti ni Carballo nga pabor siya sa maong mga kandidato, kay nagtuo siya nga ang pamilyang Duterte di magpromotar og mga politiko kinsa magpasagad sa kaayohan sa katawhan.
“Point is, maskin pag unsaon ug daut sa pangalan sa mga 'Duterte' ug sa iyahang mga ginasabak o iyahang mga ka-line up dako jud og purohan nga sila ang modaug this upcoming elections kay tungod sa iyahang nahimo,” tataw pa niya sa paghinabi niadtong Pebrero 2, 2025.
Mao sab kang Neil John Ang, usa ka respiratory therapist sa usa sa mga inilang ospital sa siyudad ug molupyo sa Talomo Proper, nagsulti sab nga ang taas nga panerbisyo, konsistent nga dedikasyon, ug kasinatian sa pamilyang Duterte niani kanila og respeto ug pagsalig sa Dabawenyos.
Resulta, palabihon nila ang pagboto alang sa mga Dutertes sa taliabot nga eleksiyon.
“Their actions have created a positive influence, leading voters to perceive them as reliable figures who align with the values desired by the people. This proven track record makes them a compelling choice for continued leadership,” pagtin-aw niya. (Rojean Grace G. Patumbon)