PATAY ang 30-anyos nga e-bike driver human kini gidunggab Agosto 10, 2025, sa Purok San Roque, Barangay Leon Garcia, Davao City.
Ang biktima giila nga si Michael Lozada, ulitawo, residente sa Rosemary Street, Barangay Tomas Monteverde, Agdao District ning siyudad sa Davao.
Base sa imbestigasyon sa kapulisan, ang insidente nahitabo pasado alas 5:30 sa hapon diin nadala pa sa tambalanan si Lozada apan gideklara kining patay na mga alas 10 sa gabii sa Agosto 11 sa iyang attending physician.
Pinaagi sa imbestigasyon sa mga awtoridad, napangalanan ang suspetsado pinaagi sa pahayag sa iyang igsuon nga si Ivan Tagimla Macatunaw, 31-anyos, usa ka traysikad driver.
Giila ang suspetsado nga si Genisis Tagimla Macatunaw, mas nailhan sa alyas nga Intsik, 29-anyos, ulitawo, ug usa ka buko juice vendor diin kini usa ka transient resident sa Loyola Street, Barrio Obrero, Barangay 17-B, Davao City, ug lumad sa Sitio Lagumit, Malita, Davao Occidental.
Ang suspetsado nagpabiling gawasnon ug padayon ang paningkamot sa pamilya sa biktima ug sa kapulisan aron kini madakpan ug mapasakaan na og kasong pagpatay pinaagi sa regular filing sa kaso.
Gihangyo sa kapulisan ang publiko nga motabang sa paghatag og impormasyon kabahin sa suspetsado aron matabangan ang hustisya nga makab-ot sa pamilya sa biktima. (Jeepy P. Compio)