MOLUSAD ang Office of Civil Defense-Davao Region (OCD-Davao) sa ikaduhang kuwarter nga National Simultaneous Earthquake Drill for 2025 sa Hunyo 19, 2025, sa Barangay Libuganon, Tagum City.
Gisulti ni Ednar Dayanghirang, Regional Director sa OCD-Davao, nga ang lugar sa Barangay Libuganon mas "challenging" itandi sa niaging mga earthquake drill nga gihimo sa Digos City, kay ang lugar pito ka kilometro ang gilay-on gikan sa gidesignar nga evacuation center.
“Imagine the need for community participation, logistics requirements, and the others, but everything is now in the final stage,” matud niya atol sa Kapehan sa Dabaw, Lunes sa buntag, Hunyo 16, 2025, sa SM City Davao.
Dugang ni Dayanghirang nga ang mga kauban sa Regional Disaster Council naglakip sa 48 ka national agencies ug 54 ka local government units (LGUs) naglangkob sa mga siyudad ug lima ka probinsiya apil na ang mga kaubang pribadong sektor sa rehiyon.
Iyang gi-esplikar nga ang drill kung nganong sa maong barangay himuon ang drill tungod kay "low-lying area" nga posibleng maapektuhan og maayo di lang sa linog apan apil na ang tsunami.
Iya sab nga gipaambit nga ang ilang buhatan nakiglambigit na uban sa Rizal Memorial Colleges (RMC) ug University of Mindanao (UM), ug naglaum sila nga makigkoordinar sab sa Ateneo de Davao University (AdDU) aron nga himuon kini nga focal point alang sa earthquake drills, kay mga tulunghaan kasagaran magsilbi nga kapuy-an atol sa maong mga kalamidad.
“Sila gyud ang highly exposed in terms of maging possible victims of earthquake disatsers, that why we would like to focus didto pod,” dugang pa niya.
Sayo niini, naglusad ang OCD-Davao sa unang kuwarter nga nationwide simultaneous earthquake drill niadtong Marso 13, 2025, kon diin daghang mga organisasyon ug mga eskuwelahan nisalmot.
Ilang gipraktis ang “duck, cover, and hold” nga paagi ug nihimo og mga evacuation procedures. (Rojean Grace G. Patumbon)