Earthquake, tsunami drill subling himuon

ARON pagpaneguro nga mamahimong andam sa linog, molusad ang Davao City Disaster Risk Reduction and Management Office (CDRRMO) og 5th City-Wide Full-Scale Earthquake and Tsunami “Shake Out” Simulation Exercise sa Hulyo 25, subay sa National Disaster Resilience Month (NDRM).

Si Lyndon Ancajas, acting division head sa LECRD–Central 911 ug acting overall CDRRMO training supervisor, miawhag sa mga Dabawenyo nga aktibong moapil sa drill, diin kini nagtimaan sa kamahinungdanon sa pag-andam sa mga komunidad alang sa mga emerhensiya.

Matud niya nga base sa nangaging mga drills, ang publiko nahimong mas malinawaton ug makahimo dayon sa pagtuman sa ilang mga tahas atol sa simulation.

“Whenever there is an earthquake, you can see mostly that in schools, there is an increase of awareness and practice of doing the right things they need to do especially when there is a sudden event,” sulti ni Ancajas.

Dugang pa niya nga ilang nakita ang positibo nga epekto sa regular nga pagbansay-bansay sa disaster preparedness ug awareness, tungod kay nagkagamay ang mga tawo nga nataranta atol sa aktuwal nga mga panghitabo sa linog.

Ang siyudad nagpahigayon sa first full-scale earthquake and tsunami drill niadtong 2017, wala’y labot ang mga tuig sa panahon sa pandemya.

Giila ni Ancajas nga nagpabiling hagit ang hingpit nga pagpatuman sa “duck, cover, and hold” protocol ug evacuations apan mao kini ang hinungdan nganong gihimo ang drill kada tuig.

Gipahinumdoman niya ang publiko nga ang CDRRMO nagpahigayon lang sa mga drills, apan ang tinuod nga mga partisipante mao ang mga miyembro sa komunidad.

Subay sa NDRM, ang CDRRMO mag-organisar usab og mga sesyon sa townhall uban sa mga opisyal sa barangay, diin ang mga representante gikan sa nasyonal ug lokal nga mga ahensiya sa gobyerno mohatag og mga input sa paggamit sa budget, giya sa pagsuspenso sa klase, monkeypox updates, bag-ong Covid-19 variants, ug camp management ug koordinasyon panahon sa kalamidad ug emerhensiya.

Dugang pa, ang buhatan mopahigayon og blood donation drive ug tree planting activity aron markahan ang tibuok bulan nga pag-obserbar.

Subling giimbitar ni Ancajas ang mga Dabawenyo nga mosalmot sa Shake Out drill nga sugdan sa alas 9 sa buntag sa Hulyo 25. (Jeepy P. Compio/CIO-Davao)