APROBADO na sa Konseho ning siyudad sa Davao ang temporaryong pagsira sa duha ka porsiyon sa dalang Roxas Avenue atubangan sa Ateneo de Davao University ug sa Aldevinco nga bahin sa Hunyo 6 o 7, alang sa kasaulogan sa Eid'l Adha (Feast of Sacrifice).
Si Konsehal Conrado Baluran, tsirman sa committee on transportation and communications, maoy nagsugyot sa ordinansa alang sa temporaryong pagsira sa dalan sa Hunyo 6 o 7, 2025, gikan alas 4 sa kaadlawon hangtud alas 9 sa buntag, agad sa resulta sa "moon sighting" nga dunay koneksiyon sa Eid'l Adha.
Gihangyo ni Pamikiren Latip Arumpac Jr., acting chairman ug deputy mayor sa Bangsa Iranun, ang temporaryong pagsira sa nahisgutang dalan ug petsa subay sa kasaulogan.
Sumala sa Republic Act 7160, nga labing nailhan sab isip Local Government Code of 1991, Section 21, nagkanayon nga ang bisan unsang nasyonal o lokal nga dalan, eskinita, parke, o bisan unsa nga lugar pampubliko mahimong temporaryong sirad-an tungod sa emerhensiya, pista, selebrasyon, rali, agricultural o industrial fairs.
Sayo niini, gideklara ni President Ferdinand "Bongbong" Marcos Jr. pinaagi sa Proclamation 911, niadtong Mayo 21, 2025, ang Hunyo 6, 2025, isip pag-obserba sa Eid'l Adha.
"Following the 1446 Hijrah Islamic Lunar Calendar, the National Commission on Muslim Filipinos has recommended that 06 June 2025, Friday, be declared a national holiday, in observance of Eid'l Adha," subay sa nahiunod sa ordinansa.
Ang Eid'l Adha maoy usa sa dagkong relihiyusong kapistahan sa Islam, kini mao ang paghandom sa kaandam ni Propeta Ibrahim nga isakripisyo ang iyang anak isip pagsunod sa Ginoo. (Rojean Grace G. Patumbon)