GIBUTYAG sa kanhi asawa ni Former President Rodrigo Duterte, Elizabeth Zimmerman, nga ang kanhi presidente luya na ug namayat na.
“I am happy that I have seen him. He is okay but he’s so thin, skin and bones,” butyag niya sa paghinabi sa mga tigbalita niadtong Biyernes, Hulyo 4, 2025, sa The Hague sa Netherlands.
Matud ni Zimmerman nga si Rodrigo di na sama og panagway kanhi ug payat na. Sulti niya nga ang kanhi presidente di ganahan mokaon ug mobalibad nga mokaon, tungod kay ang mga pagkaon balik-balik na.
Di na sab siya motumar sa iyang midekasyon apan himsog ang iyang panglawas. Apan tungod kay tigulang na, luya na siya ug maglisud na og lakaw. Ang gibuhat ni Duterte mao lang ang pagtan-aw og telebisyon ug unya matulog.
Dugang pa ni Zimmerman nga kanunay mangutana si Rodrigo bahin sa kahimtang sa Davao City ug paunsa si Sebastian “Baste” Duterte nahimong acting mayor. Gisulti sa kanhi asawa nga si Rodrigo nagpasalamat sa katawhan kinsa padayon nga nagsuporta kaniya ug okay ra siya.
Gihulipan ni Zimmerman si First District Representative Paolo “Pulong” Duterte sa The Hague, Netherlands, sa pagtan-aw kang Rodrigo human siya nadetinar tungod sa iyang gialegar nga crimes against humanity.
Sayo niini, nipaambit si Paolo nga ang iyang amahan namayat sukad sa iyang katapusang pagbisita apan gipasalig sa publiko nga nagpabilin kining himsog ang panglawas ug makahimo pa og pasiaw.
Gitug-an sab ni Vice President Sara Duterte sa niaging bulan nga si Rodrigo nigaan ang timbang sa dihang gibista siya niini. Butyag niya nga wala pa siya makakita sa iyang amahan nga ingon niini kapayat ug ang kanhi presidente wala maanad og bugnaw.
“And I think it’s the way that they cook the food. It’s not traditional Filipino food. But I’m happy that he gets rice every day. But yes, he’s given milk as well if he doesn’t have the appetite to eat,” puno pa sa bise presidente.
Gihatud si Rodrigo sa The Hague niadtong Marso 11, 2025, aron nga atubangon ang gialegar nga crimes against humanity atol sa iyang panahon sa pagka-presidente. (Rojean Grace G. Patumbon)