NADAKPAN sa kapulisan sa Sasa Police Station ang top 9 sa city level drug personality watchlist sa Davao City ug giingong empleyado sa gobyerno.
Ang suspek nailhan nga si alyas Makoy, hamtong ang pangidaron, ulitawo ug nagpuyo sa New Society Village sa Barangay Ilang, Davao City.
Nadakpan ang suspek alas 6:51 sa gabii niadtong adlaw’ng Lunes, Abril 15, 2024 sa New Society Village.
Sumala sa kapulisan sa Sasa PNP, ang suspek dugay na nga anaa sa listahan sa city level kinsa nabutang sa top 9 gumikan sa hitak niini nga pagpaninda og illegal drugs.
Dihang positibo nga mobaligya ang suspek, gilayong gikasa ang usa ka buy-bust hinungdan nga dali kining giposasan.
Nakuha gikan sa posisyon sa dinakpan ang gituohang shabu nga motimbang sa 3.99 gramos nga dunay market value nga P55,860.
Kasong kalapasan sa Republic Act 9165 kon Comprehensive Dangerous Drugs Act of 2002 ang atubangong kaso sa dinakpan didto sa korte. (JPC)