GIPATUMAN na sa bag-ong nilingkod nga mayor sa Isulan, Sultan Kudarat nga si Bai Rihan Sakaluran ang iyang unang executive order (EO) nga nagmando sa tanang empleyado sa munisipyo, opisyal sa barangay, ug mga trabahante sa gobyerno sa pagpalambo sa pagkamabination ug tiunay nga serbisyo sa tanan.
Sa EO nga gipirmahan ni Sakaluran, iyang gidasig ang mga frontliner sa munisipyo ug barangay sa pag-abi-abi sa mga bisita nga mapahiyumon ug paghatag og sinsero nga serbisyo.
Sa Facebook post sa mayor, iyang gianunsyo nga “bawal ang pagkunot sa agtang,” tungod kay kini nagpakita nga ang mapahiyumong empleyado daling duolon ug nagpakita sa pagkamapainubsanon sa usa ka empleyado o kawani sa lokal nga kagamhanan.
Gusto sa mayor nga ang tanang kawani sa gobyerno sa lungsod sa Isulan mosugat og pahiyom sa matag bisita o mosulod sa municipal hall o barangay hall ug moserbisyo og tarong gikan sa kasingkasing.
Ang pag-isyu sa EO nunot sa iyang unang opisyal nga aksiyon isip mayor pinaagi sa usa ka town-wide clean-up drive nga nagtimaan sa pagsugod sa participatory ug service-oriented nga administrasyon nga gitugyan ngadto sa people-first governance.
Base sa nasinatian sa pipila ka mga tawo nga duna matud pa'y ubang mga empleyado sa gobyerno nga katahaan nga duolan sa kliyente gumikan kay mug-ot ang dagway ug lisud pakig-istoryahan. Kini bisan pa kon nalatid sa Civil Service Laws ug ethical standards, ilabi na gyud sa Republic Act No. 6713 (Code of Conduct and Ethical Standards for Public Officials and Employees), kon unsaon sa mga kawani sa gobyerno magtagad ug mag-abi-abi sa mga kliyente.
Ang maong regulasyon nagpahimug-at sa propesyonalismo, pinaangay, ug integridad nga nagdili sa pagpangayo o modawat og mga gasa, pabor, o bisan unsang monetary value nga makakompromiso sa ilang mga tahas o makamugna og komplikto sa interes. (Edgar E. Fuerzas)