USA ka lawom nga imbestigasyon ang gihimo karon sa Tugbok Police Station sa pagpusil-patay sa usa ka engineer alas 7:35 sa gabii, Biyernes, Abril 19, 2024, didto sa Deca Homes Subdivision, Tugbok District, Davao City.
Dead on the spot ang engineer nga si alyas Michael, hamtong ang pangedaron ug molupyo sa dapit, human pusila sa wala pa mailhing mga mamumuno.
Nasayran nga gimahino sa biktima ang iyang Nissan Patrol diin sakay niini ang iyang asawa ug anak nga babaye.
Dihang na-parking na ang sakyanan ug mikanaug na ang asawa ug anak diin nakasulod na sa balay, gipabutban ang biktima sa wala pa mailhing mamumuno nga gituohang naghulat na sa dapit.
Girapido ang biktima sa makadaghang higayon nga misangko sa kamatayon niini.
Ang mga suspek gituohang riding-in tandem nga wala naka helmet ug naka facemask lamang.
Gihaya na ang patay’ng lawas sa biktima samtang ang kapulisan padayong mihimo og makuting imbestigasyon sa kremin. (Jeepy P. Compio)