GISUGDAN na ang klase sa tibuok nasud kagahapon, Lunes, Hunyo 16, nagtimaan sa pagsugod sa School Year 2025–2026.
Gilauman na sa Department of Education (DepEd) ang pagbalik sa mga 27 milyon nga mga tinun-an gikan sa preschool hangtud sa senior high school, bisan kung ang sektor sa edukasyon padayong nag-atubang og mga dugay nang mga suliran ug isyu.
Sa Davao Region, nihimo ang DepEd-Davao og "proactive steps" aron nga mabantayan ang mga magtutungha gikan sa hulga sa mpox (monkeypox), ilabi na sa pagbalik sa face-to-face nga klase.
Sa paghinabi uban sa DXDC RMN Davao sa programa niini nga “Straight to the Point,” gipasalig ni DepEd-Davao spokesperson Jenielito Atillo ngadto sa publiko nga gihikyad na ang health protocols aron motabang sa pagsanta sa bisan unsang mpox outbreak sa mga tulunghaan.
“Since the mpox cases were first monitored, we have issued memoranda on how to manage and prevent transmission,” tin-aw ni Atillo. “We’ve been conducting inspections to ensure that handwashing stations are functional and have running water. Frequent handwashing remains a key defense.”
Giklaro sab ni Atillo ang mga huhungihong nga isuspende ang klase tungod sa mpox way igong basehan. Iyang gipahimug-atan nga ang Department of Health (DOH) ug DepEd kanunay nga nagkoordinar aron nga mamonitor ang kahimtang, ug ang mga tulunghaan magpabilin nga luwas alang sa mga magtutungha.
Kini human nga daghang mga social media pages sayo ning bulana, Hunyo, nga nag-post nga ang gobyerno nagsuspende sa mga klase tungod sa padayong mga kaso sa mpox sa nasud.
“Fake news ang kumakalat na social media post tungkol sa umano’y suspension of classes dahil sa mpox virus,” sumala sa education department sa abiso sa Facebook.
Samtang ang Presidential Communications Office (PCO) wala mag-isyu og bisan unsang opisyal nga pahayag o abiso bahin sa pagsuspende sa klase may kabahin sa sitwasiyon sa mpox.
Sukad nga gisulat ning balita, way pagpahibalo ang gi-post sa social media platforms sa ahensiya.
Ang mpox mao ang viral nga sakit sama sa smallpox, nga makatakod pinaagi sa close contact uban ang "infected" nga mga indibiduwal.
Samtang bisan kinatibuk-an mas di kaayo grabe, apan ang sakit naghatag og hulga sa panglawas sa publiko, ilabi na sa mga daghang mga tawo nga lugar sama sa mga tulunghaan.
Nakatala ang DOH og mga isolated cases ning mga niaging katuigan ug nagpadayon nga nagduso alang sa "early detection and strict hygiene practices".
Dugang sa bahin sa panglawas, gitubag sa DepEd ang mga polisiya sa classroom discipline, apil na ang paggamit sa mobile phones.
Subling gikanayon sa ahensiya nga ang paggamit sa selpon panahon sa klase wala gitugot gawas lang sa espisipiko nga higayon nga gitugtan sa mga magtutudlo alang sa educational purposes.
Bisan pa sa mga suliran sa sistema sa edukasyon, mga opisyales sa DepEd sa tibuok nasud subling nibarog sa ilang komitment nga pagpalambo sa learning outcomes samtang magmentinar sa luwas, inklusibo, ug resilient nga palibot sa tulunghaan alang sa Pilipino nga mga tinun-an. (David Ezra Francisquete)