TACURONG CITY -- Pasakaan og kaso nga kalapasan sa Republic Act 9165 o Comprehensive Dangerous Drug Act of 2002 ang estudyante human nadakpan nga namaligya og shabu alas 11:25 sa gabii, Miyerkules, Enero 15, 2025, sa siyudad.
Giila ang suspek nga si alyas Arabia, 24 anyos, system junior high school student sa Alternative Learning System.
Gidakop sab ang iyang mga kauban nga sila alyas Mail ug alyas Na-im, mga molupyo sa Barangay Dalican, Datu Odin Sinsuat, Maguindanao del Norte.
Sumala kang Kat Abad, tigpamaba sa Philippine Drug Enforcement Agency (PDEA) sa Soccsksargen, nga nagpahigayon sila og drug buy-bust operation, uban ang kapulisan sa Purok 5, Barangay Poblacion, Tacurong City.
Atol nga gitunol na sa estudyante ang shabu sa PDEA asset, dali sab dayon siya ug mga kauban giambakan sa kapulisan ug giposasan.
Nakuha gikan sa posisyon sa mga suspek ang kantidad P680,000 nga shabu.
Balhog na ang tulo sa prisohan sa Tacurong City Police Station samtang giplastar pa ang tukmang kaso nga ipasaka batok kanila. (Edgar E. Fuerzas)