KUSGANONG gikondena ni Member of the Parliament Abdulbasit Benito atol sa iyang privilege speech sa regular session sa Bangsamoro Transition Authority (BTA) ang padayon nga pagkatag sa "fake news, dummy accounts, and online disinformation" sa social media.
Matud sa magbabalaod, ang maong digital abuses dili na usa ka yanong insidente kon dili organisado ug sistematikong lakang aron gub-on ang dungog sa mga lider, apil na ang iyang kaugalingon nga biktima niini. Iyang gipadayag ang epekto niini sa pagsalig sa publiko, panaghiusa sa komunidad, ug pundasyon sa demokrasya sa Bangsamoro.
Nanawagan siya sa mga kaubang magbabalaod nga molihok pinaagi sa mga balaod, regulasyon, ug koordinasyon sa mga ahensiya aron mapugngan ang online nga pagpanglingla. Matud niya, gawas sa polisiya, kinahanglan usab nga balikon ang mga mithi nga gitudlo sa Islam, ilabi na ang kamatuoran ug hustisya.
Isip pahinumdom, giawhag niya ang publiko ug mga opisyal nga dili suportahan o ipaambit ang peke nga mga istorya gikan sa wala mailhi o malisyuso nga gigikanan. Siya miingon nga ang matag "like" ug "share" makapalig-on sa sayop nga inpormasyon.
Gitapos sa magbabalaod ang iyang pulong uban ang panawagan alang sa "digital discipline, media literacy, and ethical" nga paggamit sa social media aron kini magsilbing dalan sa panaghiusa, dili pagkabahin-bahin. (Edgar E. Fuerzas)