WA PA'Y matumbok nga posibleng motibo ang kapulisan sa pagpatay sa usa ka forester human gipusil sa wala mailhing mga armado sa Purok 3, Barangay San Roque, Nabunturan, alas 7:20 sa buntag , Lunes, Agosto 19, 2024.
Ang biktima giila nga si Eduardo Orias Sagarino, 60-anyos, minyo, forester sa Department of Environment and Natural Resources (DENR), ug molupyo sa Alvana Subdivision, Barangay Poblacion, Nabunturan.
Base sa taho nga usa ka nagpakabanang lungsuranon ang mitaho ngadto sa Nabunturan Municipal Police Station pinaagi sa pagtawag sa hotline number kabahin sa maong insidente sa nahisgutang dapit.
Tuod man sa pagkadawat sa maong taho, kapulisan sa Nabunturan MPS pinangulohan Police Senior Sergeant Kyjie R. Jupia, duty investigator, dayong miresponde sa dapit aron sa pagsusi sa hitabo.
Matud pa nga sa pag-abot sa dapit, maoy nakita sa mga pulis ang patay’ng lawas sa lalaki nga nagbuy-od sa kanal mismo ug ang gituohang motorsiklo nga iyang gimaneho kilid sa kanal.
Mga molupyo sa duol nagsulti nga nakadungog sila’g sunod-sunod nga buto sa pusil ug dayong gisundan og kusog nga harurot sa motorsiklo palayo.
Sa dihang ilang gisusi ang lugar maoy nakit-an ang biktima nga nagbuy-od na sa kanal ug naglunang sa kaugalingong dugo.
Base sa imbestigasyon sa kapulisan, ang biktima nagsakay sa gimaneho niyang motorsiklo subay sa dalan sa Maharlika National Highway paingon sa siyudad sa Tagum dihang gipusil sa wala mailhing mga armado nga nagsunod kaniya.
Ang biktima nakahiagom og samad pinusilan sa dughan nga miresulta sa hinanali niyang kamatayon.
Sa paghagpat ning maong balita, kapulisan padayon pang nag-imbestigar sa tinguha nga mailhan ug madakpan ang mga responsable sa krimen. (DTV)