GIPASPASAN karon ni General Santos City Lone District Representative Loreto Acharon ang pag-lobby sa 19th Congress aron nga mapasar ang balaudnon nga magtunga sa siyudad ngadto sa duha ka legislative districts.
Base sa House Bill No. 11441 nga gipangamahan ni Cong. Acharon, nagtinguha kini sa pagbahin sa siyudad ngdato sa duha ka distrito nunot sa padayon nga pagdaghan sa populasyon sa siyudad nga niabot na sa dul-an 700,000 niadtong 2020.
Sa pagtunga sa siyudad, mahatagan sila og mas patas nga alokasyon subay sa Philippine Development Plan 2023-2028.
Ubos sa balaudnon, ang 1st legislative district maglakip sa mga barangay sa Batomelong, Upper Labay, Olympog, Conel, Mabuhay, Tinagacan, Katangawan, Ligaya, Lagao, Baluan, Buayan, Bula, San Isidro, City Heights; ug Dadiangas North, South, East, ug West.
Samtang ang 2nd district naglakip sa mga barangay sa Sinawal, San Jose, Siguel, Tambler, Calumpang, Fatima, Labangal ug Apopong.
Nasayran nga Pebrero 3 gisang-at ang maong balaudnon ug gi-refer kini ngadto sa House Committee on Local Government niadtong Hunyo 3.
Kon dili kini mapasar sa pagtapos sa 19th Congress karong Hunyo 13, ibalik kini sa 20th Congress nga mag-convene sa Hulyo 28. (Edgar E. Fuerzas)