GENERAL SANTOS CITY -- Pasakaan og kasong pagpatay ang mag-uuma nga nipatay sa iyang silingan alas 8:00 sa gabii, Dominggo, Abril 6, 2025, sa Tupi, South Cotabato.
Giila ang napatay nga si alyas Bert samtang ang suspek mao si alyas Leo, mga molupyo sa Sitio Glandang, Barangay Kablon, Tupi.
Sa taho gikan sa Tupi Municipal Police Station (MPS), nasayran nga nagtagay og makahubog nga ilimnon ang biktima duol sa ilang gipuy-an, uban ang suspek.
Sa dihang nangalango na, nagkalalis ang duruha tungod sa daan nilang bingkil sa uma nga ilang giugmad.
Tungod sa kasuko sa suspek, kalit kining mikuha og bara ug gibunalan sa ulo sa biktima.
Patay gilayon si alyas Bert nga nakaangkon og samad sa ulo nga miliki.
Misulay pa sa pagsibat ang suspek, apan nadakpan kini sa mga miyembro sa Barangay Peacekeeping Action Team (BPAT).
Balhog na ang suspek sa prisohan sa kapulisan sa Tupi MPS ug mag-atubang og kasong pagpatay. (Edgar E. Fuerzas)