TABANG gikan sa gobyerno ang singgit karon sa mga residente nga naapektuhan sa demolisyon sa Upper Arroyo Compound, Barangay Matina Crossing, Davao City.
Alas 6 pa lang sa buntag kagahapon, Biyernes, Mayo 23, 2025, mi-posting na ang gibana-bana nga 500 ka mga tawo nga maoy naglangkob sa demolition team nga moguba sa kabalayan sa maong dapit.
Sa impormasyon gikan kang Davao City Police Office (DCPO) spokesperson Police Capatain Hazel Tuazon nga mokabat sa 300 ka mga pulis ang gipang-deploy atol sa demolisyon aron magpabilin ang kahapsay sa dapit.
Sumala ni Tuazon nga ang demolisyon ubos sa pagdumala ni Sheriff Imelda Navasca kinsa maoy midala sa istorya ug kaso sa maong luna.
Gipresenta ni Sheriff Navasca ang mga papeles alang sa demolisyon hinungdan nga wala nay nahimo pa ang mga residente kon di ang boluntaryo na lang nga miguba sa ilang mga panimalay ug dali nga mihikling sa ilang mga gamit.
Subay sa court order, anaa lang sa pito ka mga panimalay ang angay i-demolish apan, nakurat na lang sila nga ang uban pang mga panimalay lakip sa gipangguba.
Ang purok leader nga si Dodong Sanggo nanawagan sa lokal nga gobyerno nga unta mahatagan sila og tabang.
Anaa sa mokabat kapin kon kulang 3-ektarya ang maong luna nga dunay 80 ka mga panimalay nga gilangkuban sa 400 ka mga pamilya, 60 ka mga senior citizens ug 200 ka mga bata.
Alas 3 sa hapon Biyernes, nagpadayon ang pagpangguba sa kabalayan sa dapit. (Jeepy P. Compio)