Giilogan og motor; gipusil, gidunggab

HUSTISYA ang singgit sa pamilya sa gipatay nga dagit-dagit drayber ug construction worker ala 1:05 sa hapon, Sabado, Marso 29, 2025, sa Midsayap, probinsiya sa Cotabato.

Giila ang biktima nga si Ronilo Nicor Valenzuela alyas Taroroy, 59-anyos, minyo ug nagpuyo sa Purok 4, Barangay Upper Glad 2, Midsayap.

Matud ni Midsayap Chief of Police, Police Lieutenant Colonel Arniel Melocotones nga duha ka wala mailhing lalaki ang mipakyaw sa biktima gikan sa Barangay Poblacion paingon sa Baranga Salunayan sa maong lungsod.

Pag-abot niini sa Barangay Salunayan, mipara ang mga suspek ug gipusil ang biktima gamit ang kalibre .45 nga pistola.

Wala pa makontento ang mga karnaper, gidunggab pa nila si Valenzuela sa abaga ug kilid sa lawas gamit ang icepick.

Miikyas sab dayon ang mga suspek dala ang motorsiklo ni Valenzuela padulong sa hilit nga lugar sa Midsayap.

Ang biktima daling gidala sa mga mirespondeng pulis sa balay tambalanan apan gideklara sa doktor nga dead on arrival human makaangkon og samad pinusilan sa apapangig nga milapos sa dalunggan ug samad dinunggaban sa lawas.

Gikanayon sa asawa, Lodi, nga buotan ang iyang bana ug walay atraso ug kugihan nga nagsuporta sa ilang pamilya.

Tungod sa kalisod ug daghan pa sila'g mga anak, nangayo siya'g tabang alang sa pagpalubong sa biktima.

Nanawagan usab ang asawa ngadto kang Midsayap Mayor Rolly Sacdalan nga tabangan sila aron makab-ot ang hustisya sa nahitabo sa iyang bana.

Sa pagkakaron, padayon pa ang imbestigasyon sa Midsayap Municipal Police Station aron masayran ang bansagon sa mga mamumuno nga mipatay ug mikawat sa motorsiklo sa biktima. (Edgar E. Fuerzas)