KIDAPAWAN CITY -- Tingkagol sa prisohan ang suspek nga nagkarga og P4.7 milyones nga smuggled cigarettes alas 2:00 sa hapon, Martes, Mayo 27, 2025, sa Midsayap, probinsiya sa Cotabato.
Giila ang suspek nga si alyas Jimmy, 41 anyos, drayber sa wing van ug nagpuyo sa Misamis Oriental.
Gibutyag ni Misayap chief of police, Police Lieutenant Colonel Benhu Catcatan, nga nakadawat sila og intelligence report nga dunay ipalusot nga smuggled cigarettes nga ikarga og wing van.
Abtik nga nagpahigayon og anti-smuggling operation ang hiniusang puwersa sa Regional Intelligence Division 12, Midsayap Municipal Police Station, 2nd Cotabato Provincial Mobile Force Company, Provincial Intelligence Unit–Cotabato Police Provincial Office, ug North Cotabato Highway Patrol Team sa Barangay Sadaan, Midsayap.
Atol sa pag-agi sa wing van nga gimaneho ni alyas Jimmy gipara kini sa mga pulis ug giukay ang karga niini.
Nadiskubre sa mga pulis ang mokabat sa 120 ka karton sa Walton brand cigarettes nga dunay kinatibuk-ang kantidad nga P4,714,800.
Tingkagol ang suspek sa prisohan sa Midsayap Municipal Police Station ug pasakaan og mga kaso nga kalapasan sa Republic Act 10863 o Customs Modernization and Tariff Act, ug Republic Act 10643 o Graphic Health Warnings Law. (Edgar E. Fuerzas)