Gipatay sa nakautang?

Gipatay sa nakautang?
Hulagway kuha ni Sammy Baug sa dxRR Radyo Rapido Davao

POSIBLENG tungod sa utang ang gitan-aw nga anggulo sa pagpusil-patay sa pasahero sa taxi, Miyerkules sa buntag, Hunyo 19, 2024, gawas sa Chinese Cemetery sa Circumferential Road, Barangay 19-B, Poblacion, Davao City.

Kini ang gibutyag ni Davao City Police Office (DCPO) spokesperson Police Captain Hazel Tuazon nga ang negusyo sa biktima usa ka "lending".

Dugang ni Capt. Tuazon nga posible ang motibo sa krimen mahitungod sa utang gumikan giingong daghan og gipang-file-lan og kaso ang biktima sa korte, kadtong mga tawo nga wala nakabayad og utang kaniya.

Saysay sa drayber sa taxi nga gikan ang biktima nga nisakay sa Ecoland Terminal, atubangan sa Hall of Justice, kinsa nagpahatud kini sa Ladislawa Subdivision sa Bacaca Road.

Pag-abot sa taxi atubangan sa Chinese Cemetery, gitaparan kini sa giingong riding-in tandem, dayon gipaulanan og bala ang taxi punting sa biktima.

Gilayong napadaplin sa drayber ang taxi ug nahunong sila sa daplin sa kalsada kilid sa sementeryo, diin ang biktima naligo na sa dugo samtang ang drayber nadaplisan sa bala sa tiyan.

Nakabsan sa kinabuhi ang biktima samtang ang drayber nasamdan sa tiyan.

Ang DCPO wala pa nakapagula og opisyal nga spot report bahin sa krimen. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph