DAVAO DEL NORTE – “Love triangle” ang gitumbok nga motibo sa pagpatay sa 55 anyos nga mister sa wala mailhing mga armado alas 7:30 sa buntag, Mayo 6, 2025.
Ang biktima giila nga si Benedicto Perez Nalzaro, minyo, ug molupyo sa nahisgutang dapit.
Subay sa report, nasayran nga ang biktima nagtindog niadtong higayona sa Barangay Road atubangan sa iyang panimalay, dihang usa sa mga suspek niduol kaniya ug sa wa’y daghang istorya, gipusil siya.
Apan giingon nga sa maong pagpusil, wa maigo ang biktima ug nakahimo pa kini pagdumog sa suspek aron ilugon ang armas niini.
Ug samtang nag-ilogay sa armas, giingon nga ang ikaduhang suspek nga nagsilbing back-up niduol ug gipusil ang biktima nga maayong pagkaigo sa lawas.
Apan luyo sa samad pinusilan nga naangkon, nakadagan pa ang biktima padulong sa likod nga bahin sa Magsaysay Elementary School sa maong dapit aron nga molingkawas sa mga suspek.
Apan giingon nga gigukod sa mga suspek ang biktima ug giusban og pusil sa makadaghang higayon hangtud nga natumba sa yuta.
Human sa gihimong pagpamusil, mga suspek nagdaling nangagiw paingon sa Sitio Alemag, Purok 7, Barangay Alejal, Carmen.
Dali nga niresponde ang rescue team sa lokal nga panggamhanan sa Carmen ug gidali pagdala ang biktima sa Carmen District Hospital aron nga matambalan apan gideklarang dead on arrival sa doktor nga mihiling kaniya.
Narekober gikan sa crime scene ang 4 ka basiyo ug usa ka balines sa bala ug laing usa ka buhing bala.
Gituohang motibo sa krimen mao ang love triangle, apan padayon pa sab nga giimbestigahan sa kapulisan sa Carmen Municipal Police Station ang mga posibleng lain pang mga anggulo.
Gilusad na ang hot pursuit operation sa kapulisan sa Carmen alang sa posibleng pag-ila ug pagdakop sa mga suspek. (Dexter T. Visitacion)