HANGTUD karon, nagpadayon ang imbestigasyon sa kapulisan labot sa kamatayon sa usa ka babaye ug lalaki sud sa usa ka condo diha sa Bajada ning siyudad sa Davao.
Sa uwahing katikaran sa kaso, gikumpirma sa hepe sa Davao City Police Office (DCPO) nga magkarelasyon ang duha ug walo ka tuig na nga nag-ipon.
Kini subay sa pahayag ni Colonel Richard Bad-ang, hepe sa Davao City Police Office sa Newsforth, usa ka Davao based online media platform.
Luyo niini, gidugang sa hepe nga crime of passion ug personal ang duha sa anggulo nga ilang gitutukan.
Duha ka indibidwal sab ang giingong persons of interest sa hitabo nga suma pa maoy nagbook sa mga biktima sa maong condo unit.
Sa pagsusi sa kapulisan kumpleto ang gamit sa mga biktima.
Wala pa panganli
Sukad pagsuwat ning balita, Abril 22, 2024, wala pa gipang-ila sa Bajada Police Station ubos sa Davao City Police Office (DCPO) ang lalaki ug babaye nga napalgang patay sa usa ka condominium sa Bajada Davao City adlaw’ng Dominggo, Abril 21.
Apan sa post sa ilang mga higala, kaila ug pamilya nga nagpakitabang online sa pagpangita kanila, giila ang duha nga sila sila Jeff Predas ug Jennifer Chavez nga pulos mga dayo sa Davao City.
Sa impormasyon nga nakalap sa SuperBalita Davao gikan sa mga kasaligan nga netizens, miadto sa Davao City ang duha aron nga mutan-aw og concert sa "We The Kings" sa SMX Lanang.
Alas 6 Sabado sa buntag miabot si Jennifer sa Davao City ug ulahi kining naka-istorya sa iyang inahan alas 9 Sabado sa gabii.
Lunes, Abril 22, miabot sa Davao City ang pamilya sa mga biktima, apan ang update sa istorya naulahi gikan sa paghan-ay ning maong balita Lunes sa udto.
Kahinumdoman nga usa ka lalaki nga dunay daghang tattoo ugu mga dinunggaban sa lawas sayo sa buntag niadtong Dominggo, Abril 21, 2024, ang napalgan sa ground floor. Pagka-gabii, napalgan sab ang patay’ng lawas sa usa ka babaye sulod sa unit nga 319 sa condominium. (Jeepy P. Compio)