Gitahang pusil ni ACQ kuwang na

Gitahang pusil ni ACQ kuwang na
Hulagway gikan sa Police Regional Office-Davao

LIMA gikan sa 19 ka armas ni Kingdom of Jesus Christ (KJC) founder Pastor Apollo C. Quiboloy ang gisurender ngadto sa Police Regional Office (PRO)-Davao Region Miyerkules sa buntag, Mayo 8, 2024.

Ang maong mga armas may lisensiya sa ngalan sa pastor nga una nang gitangtangan og permit sa Philippine National Police (PNP) tungod sa mga kasong giatubang karon ni Quiboloy.

Ang abiso sa pagpasurender sa mga armas gidawat ni Marlon Acobo, executive pastor, ug authorized representative ni Quiboloy sa Jose Maria College, Philippine-Japan Friendship Highway, Sasa, Davao City.

Suma pa nga gitunol ni Acobo ang lima ka armas nga gilangkuban sa usa ka Colt rifle, duha ka Beret pistols, ug duha ka Metrillo pistols.

Apan ang ubang armas wala masurender tungod giingong nabaligya na kini.

Wala na sab panganli pa kon unsa kini nga matang sa mga armas.

Isip pamatuod nga nabaligya na kini, si Acobo mihatag sab sa mga dokumento ngadto sa awtoridad.

Sa pikas bahin, padayon gihapon nga gipangita ang pastor tungod sa mga kasong giatubang niini sa kasamtangan. (Rhona Goc-ong-Villariasa)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph