GITAKDA sa Konseho ning siyudad sa Davao ang pag-imbita sa Davao Light and Power Company (Davao Light) ug telecommunications companies aron nga i-esplikar ang kalangay sa pagbalhin sa mga poste duol sa Maa Flyover Project.
Ang resolusyon gisugyot ni Konsehal Diosdado Angelo Mahipus atol sa sesyon sa Konseho niadtong Martes, Agosto 12, 2025, sa Sangguniang Panlungsod.
Matud niya nga tinguha niini nga mopasar og resolusyon nga mag-awhag sa Davao Light sa paglukat sa mga poste, ug buot niya nga sila moatubang sa Konseho sa Agosto 19, 2025.
"May I request their presence on the next session day so that we can hear from them the pros and cons of moving ahead with the transfer at the soonest possible time and perhaps get a commitment from them to immediately relocate it," matud niya.
Kini human nga ang Department of Public Works and Highways-Davao Region (DPWH-Davao) nagtaho atol sa sesyon nga ang pagkadelatar sa Maa Flyover Project tungod sa Road Right of Way (RROW) nga mga isyu ug ang nakaung-ong nga pagbalhin sa mga poste.
Ang ahensiya giimbitahan ni Konsehala Jessica Bonguyan aron nga mohatag og katikaran sa proyekto.
Si Dean Ortiz, tigpamaba sa DPWH-Davao, nagkanayon nga sa 41 ka naapektuhan nga propedad, 29 niini naareglo na -- 2 sa 2023, 16 sa 2024, ug 11 sa 2025.
Sa 12 nga nahabiling propedad, ingon niya nga ilang gihatagan og prayoridad ang upat: duha niini gipanag-iya sa real estate companies, usa sa gas station, ug usa sa pribadong indibiduwal.
"But within those properties are the poles of Davao Light and Power Company and the telecommunications company so that's giving us the problem karon [right now], so they need to move...relocate these poles sa portion namo nga na widen na [to the portion that we already widened," tug-an niya sa dihang nahinabi sa mga tigbalita.
Iyang gi-esplikar nga ang road improvements ubos sa superstructure sa flyover gikinahanglan aron nga ang konstraksiyon makapadayon na sa "approach."
Kung ugaling ang Davao Light makabalhin na sa mga poste ug uban pang mga kondisyones nga mopabor kanila, gipasalig niini nga maagian na ang flyover sa Disyembre 2025, ug ang RROW malimpyo na, ang tibuok proyekto matapos na sa Marso 2026.
Samtang si Fermin Edillon, pangulo sa Davao Light's Reputation Enhancement Department, nag-esplikar nga ang kompaniya di pa makabalhin sa mga poste hangtud ang mga isyu sa RROW sa lugar maresolba na.
Tug-an niya nga sa dihang ilang gibalhin ang poste, apan wala madugay human sa paghimo niini, ang tag-iya sa propedad naghulga kanila nga mohimo og legal nga aksiyon.
"Naga closely coordinate amoang team sa ilaha and ma transfer na namo, infact naka- transfer nami sa uban kana na lang gasoline station dinha na they are still protesting," esplikar niya atol sa Habi at Kape niadtong Miyerkules, Agosto 13, 2025, sa Ayala Malls Abreeza.
Dugang ni Edillon nga kung ang mga isyu sa RROW maareglo na, ibalhin gilayon sa Davao Light ang mga poste ug duna silay igong mga personahe nga motrabaho niini.
Iya sab nga giklaro nga di nila kining mabalhin og ingon niini kasayon nga walay igong pagplano, kay tumong nila nga baldahon lang ang serbisyo sa kuryente makausa.
Iyang gipasalig ngadto sa publiko nga mohatag sila og katikaran matag karon ug unya sa progreso sa relokasyon sa mga poste.
Kahinumdoman, gisulti ni Ortiz niadtong Nobyembre 27, 2024, nga ang Maa Flyover gilauman nga matapos sa uwahing bahin sa 2026 o sayo sa 2027.
Apan pipila ka porsiyon sa proyekto nag-atubang og pagkadelatar tungod sa mga isyu sa RROW. (Rojean Grace G. Patumbon)