KIDAPAWAN CITY — Gipangita na sa awtoridad ang duha ka tawo nga sakay sa motorsiklo nga nanglabni og bag sa usa ka magtutungha ug naguyod pa sa motor alas 12:05 sa udto, Miyerkules, Pebrero 14 sa probinsiya sa Cotabato.
Ang biktima mao si alyas Brendo, Grade 6 ug nagpuyo sa Barangay Sadaan, Midsayap, North Cotabato.
Gibutyag ni Midsayap Chief of Police Lieutenant Colonel John Miridel Calinga nga samtang naglakaw ang biktima kilid sa national highway sa Brgy. Sadaan pauli na sa ilang balay gikan sa tulunghaan niini.
Apan kalit lang mibutho ang duha ka wala mailing tawo nga sakay sa motor nga walay plaka ug gilabni ang bag sa bata diin naguyod pa kini pipila ka metros ang gilay-on.
Abtik nga mitabang ang mga sibilyan ug miikyas ang mga suspetsado paingon sa direksiyon sa Aleosan Cotabato.
Gidala sab dayon sa mga sakop sa PNP 2nd Cotabato Provincial Mobile Force Company ang bata sa balay-tambalanan og luwas na sa makuyaw nga kahimtang kinsa nakahiagom og daghang samad sa lawas human kini maayong pagkabagnos sa kalsada.
Nakuha sa mga suspetsado sulod sa bag sa biktima ang iyang cellphone ug mga kagamitan sa pagtungha niini.
Nagpasidaan si Midsayap Mayor Rolly Sacdalan sa mga ginikanan nga bantayan ang ilang mga anak.