NADAKPAN sa Ecoland Police Station uban sa 1st City Mobile Force Company ang usa ka tinun-an sa Grade 8 nga naninda og gituohang shabu pasado ala 1:14 sa kaadlawon, Abril 6, 2024 sa Ecoland Times Beach, Barangay 76-A, Davao City.
Si Police Major Rosario Aguilar, hepe sa Ecoland PNP, nag-ila sa suspek nga mao si alyas Boss, 18-anyos, ug residente sa nasampit nga dapit.
Narekober sa posisyon sa dinakpan ang usa ka pakete sa gituohang shabu, marked money, ug drug paraphernalia.
Gihikay na sa kapulisan sa Ecoland PNP ang pagpasaka og kasong pagsupak sa Republic Act (RA) 9165 kon Comprehensive Dangerous Drugs Act of 2002.
“Walay gipiling edad, kasarian o istado sa kinabuhi ang pwedeng dauton sa ginadili na droga. Busa sa mga ginikanan, mintras bata pa ang atong mga anak, ato silang igiya sa matarong na dalan, i-monitor nato ilang mga aktibidades, aron mahalikay sila niining mga dautang bisyo,” sulti ni Major Aguilar sa mga tigbalita. (JPC)