GISULTI ni kanhi President Rodrigo Duterte nga di siya makasalig sa gihanyag nga pagpakig-uli ni President Ferdinand Marcos Jr.
Ang pahayag gipaagi sa igsuong lalaki ni Rodrigo, Benjamin “Bong” Duterte, ngadto sa mga suporter ni Duterte nga naghuwat sa gawas sa detention facility sa Netherlands.
“Parang nagkuan siya ‘No way,’ he doesn’t believe it,” matud niya niadtong Mayo 21, 2025.
Sayo niini, gisulti ni Marcos sa unang episode sa iyang podcast nga gidumala ni Anthony Taberna nga siya abli sa pagpakig-uli uban sa pamilyang Duterte.
Matud niya nga gikinahanglan niya mga higala, dili mga kaaway, kay buot niyang mahatud ang iyang mga programa sa nahabiling tuig sa iyang termino.
“Hanggat maari ako ang habol ko ay yung stability, peaceful, para magawa namin ang trabaho namin. Kaya ako lagi akong bukas,” pung pa niini sa iyang podcast nga na-post sa iyang Facebook page sa Mayo 19, 2025.
Kini nahitabo usa ka semana human pipila ka kaalyado ni Vice President Sara Duterte nidaug sa 2025 National and Local Elections (NLE).
Sulti sab ni Benjamin nga iyang gipahibawo si Rodrigo nga buot ipadayon ni Sara ang impeachment, kay gusto niya og “bloodbath.”
Unya nagpahimangno si Rodrigo nga si Sara kinahanglan nga bantayan og maayo, kay di siya magpapugong, ang ideya nga gipalanog ni Benjamin, kinsa niingon nga karon, mas labaw na nga si Sara di mapugngan ilabi na nga si Rodrigo nadetinar.
Dugang pa niya nga ang kanhi presidente himsog ug makahimo pa gihapong magpasiaw (“witty jokes”). Wala sab siya maka-obserba og bisan unsang kausaban sa panglawas ni Rodrigo ug iya siyang gihupay pinaagi sa pag-ingon nga mabuhian ra siya sa di madugay.
Hinuon, wa mahisguti niya ngadto kang Rodrigo bahin sa progreso sa iyang kaso, inay iya siyang gihatagan og mga katikaran sa kahimtang sa politika sa Pilipinas ug uban pang butang bahin sa pamilya.
Sulti ni Benjamin nga mapasalamaton si Rodrigo sa mga suporter kinsa padayon nga nagpabilin sa gawas sa pasilidad ug nagpakita sa ilang suporta.
Nabalaka si Rodrigo bahin sa mga suporter nga pursigido gyud aron nga mosuporta kaniya.
Gikanayon niini nga milaum sila nga mobisita si Sara ug bisan kinsa sa anak ni Rodrigo magpuli-puli sa pagbisita kaniya. (Rojean Grace G. Patumbon)