Hubog nalumos sa sapa, patay

PATAY ang hubog human nga nalumos sa sapa alas 8:20 sa buntag niadtong Lunes, Agosto 19, 2024, sa Feria Street, Barangay Calinan, Davao City.

Base sa report sa Calinan Police Station, ang biktima nailhang si Marvin M. Villegas, 43-anyos, taga Sitio Regla, Barangay Leon Garcia Sr., Agdao District, siyudad sa Davao.

Sumala ni Police Major Leo Arvin Alce, station commander sa Calinan Police Station, uwahing nakita ang biktima mga alas 4 sa hapon niadtong Dominggo, Agosto 18, kinsa pauli na sa iyang pinuy-anan ilawom sa tulay.

Nasayran nga una niuli ang biktima sa iyang temporaryo nga balay ilawom sa tulay, nakigtagay pa kini sa iyang mga barkada.

Pagkabuntag, nakurat na lang ang mga residente dihang ilang nakita nga dunay tawo nga gituohang wala nay kinabuhi nga miunlod sa sapa.

Gilayong miabot ang mga taga barangay sa pagpanguna ni Barangay Kagawad John Simangan ug ang Calinan PNP diin subay sa ilang pakisusi, walay nakitang indikasyon nga dunay foul play ang kamatayon sa biktima kinsa nalumos. (JPC)