Hubog nga anak gitigbas sa amahan ang liog

Hubog nga anak gitigbas sa amahan ang liog
DEXTER VISITACION

DAVAO DEL NORTE — Sa ospital nahuwasan sa kahubog ang 48-anyos nga anak human natigbasan sa iyang amahan nga iyang nakabangi didto sa Purok 2, Brgy. Magsaysay, Carmen alas 9:30 sa gabii, Marso 19, 2024.

Ang biktima mao si Ariel Delfin Abapo, 48-anyos, ulitawo ug molupyo sa Purok 4A, Brgy. Lower Magsaysay, Carmen samtang ang suspek mao ang amahan niini nga si Arsenio Valparaiso Abapo, 73-anyos.

Base sa inisyal nga imbestigasyon, samtang ang suspek nagpahulay sulod sa ilang panimalay miabot ang biktima nga ubos sa impluwensiya sa ilimnong makahubog.

Giingong nagkalalis ang mag-amahan sa wa gibutyag nga hinungdan hangtod nga miabot sa punto nga mikuha’g sundang ang amahan ug iyang gitigbas ang anak nga maayong pagkaigo sa tuong bahin sa kilid sa liog.

Gidali pagdala ang biktima sa Carmen District Hospital sakay sa LGU Ambulance samtang ang suspek naaresto sa mga sakop sa BPAT’s sa Brgy. Magsaysay dayong gi-turnover sa mga miresponde nga pulis.

Narekober gikan sa crime scene ang sundang nga dunay gitas-on nga 20 pulgada nga maoy gigamit sa suspek sa pagtigbas sa biktima.

Anaa karon sa kustodiya sa mga pulis ang suspek alang sa tukmang disposasyon. 

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph