KASONG murder ang gipasaka sa Mandug Police Station batok sa ulitawo nga mipatay sa watchman Dominggo sa gabii, Disyembre 8, 2024, sa Sitio Matogbi, Barangay Callawa, Davao City.
Dead on the spot ang 62 anyos nga biktima human ihawa sa 23 anyos nga construction worker gamit ang kutsilyo.
Giila ang biktima nga si Antonio (bansagon gitago), taga Vista Verde, Panacan, siyudad sa Davao samtang ang suspek mao si alyas Jo, taga Sitio Matogbi, Barangay Callawa, Davao City.
Gibutyag ni Davao City Police Office (DCPO) spokesperson Police Captain Hazel Tuazon nga niadto pang adlaw’ng Biyernes, Disyembre 6, naa na suma pa’y kainom ang suspek kinsa dunay kalagot sa biktima.
Dugang ni Tuazon nga daw gipalit sa suspek ang kalagot sa iyang kainom ngadto sa biktima, hinungdan siya ang nipatay niini.
Ang biktima nahiagom og mga samad-dinunggaban sa ubos nga bahin sa liog nga miresulta sa hinanaling kamatayon.
Saysay sa nakasaksi nga iyang nakita ang biktima nga gipangkuhaan og hulagway ang mga construction materials isip kabahin sa trabaho niini.
Apan gitawag matud pa ang biktima sa suspek nga giingong hubog. Dihang nakaduol si Antonio sa suspek, kalit matud pa siyang gidunggab tumong sa liog.
Dali nga misibat ang suspek samtang ang biktima nabugtoan gilayon sa kinabuhi tungod sa grabeng mga samad nga naangkon.
Nasayran nga misurender sab dayon ang suspek sa kapitan sa Barangay Callawa ug gilayong gi-turnover sa kapulisan sa Mandug kinsa napasakaan na og kasong murder niadtong Lunes sa korte. (Jeepy P. Compio)