KIDAPAWAN CITY -- Hustisya ang singgit sa pamilya sa micro finance officer kinsa gipusil patay alas 12:30 sa udto, Nobyembre 30, 2024, sa Sitio Sacab, Barangay Manarapan, Carmen, Cotabato Province.
Giila ang biktima nga si Billy Lamasan Cordero, 28 anyos, ulitawo, ug nagpuyo sa Tinaungan, President Quirino, Sultan Kudarat Province.
Naangol sab si alyas Ben nga kauban sa biktima nga iyang angkas sa motorsiklo.
Gibutyag ni Carmen chief of police, Police Lieutenant Colonel Nestor Maderse, nga sakay ang mga biktima sa usa ka motorsiklo sa Sitio Sacab, Barangay Manarapan, Carmen nga karon sakop na sa Special Geographic Area (SGA) sa Bangsamoro Autonomous Region in Muslim Mindanao (Barmm), kalit lang gitaparan sa duha ka mga wala mailhing lalaki nga sakay sab og motorsiklo ug gipamusil ang mga biktima.
Abtik sab nga miikyas ang mga suspek dala ang koleksiyon sa mga biktima.
Gisapupo sa mga opisyales sa barangay ang mga biktima ug gidala sa Carmen District Hospital apan namatay si Cordero.
Sa pagsuwat ning balita, ang kapulisan sa Carmen Municipal Police Station padayon ang imbestigasyon sa hitabo. (Edgar E. Fuerzas)