NILAUM ang City Tourism Operations Office (CTOO) nga kapin sa 200,000 ka mga turista ang mobisita sa Davao City alang sa taliabot nga "Duaw Davao 2025."
Gisulti ni Kathryn Fabul, tourism operations officer ug pangulo sa Promotions and Branding Section sa CTOO, nga nilaum sila nga malabwan pa ang 200,000 nga target nga gitakda sa 2024.
“We are aiming for a higher number now, but if the situation changes, that's something we really cannot control. Let's see in the coming days,” matud niya atol sa ISpeak media forum, Huwebes sa buntag, Mayo 29, 2025, sa City Mayor’s Office.
Giesplikar ni Fabul nga tumong nila nga motaas ang ihap sa lokal nga turista gikan sa kasilinganang siyudad, munisipyo, ug probinsiya.
Apan naningkamot sab sila nga makadani og mga turistang langyaw bisan kung ang ilang ihap medyo gamay lang.
Gipasabot niya nga bisan og ang Duaw Davao mao pa ang iyang ikaduhang tuig, nagpakita na kini og lig-ong pagtubo, ug nilaum sila nga magpadayon ang pagtaas sa ihap sa mga turista.
Samtang si Mary Grace Plata, tourist specialist sa CTOO, nagkanayon nga naglaum sila og dugang pagtaas sa tourist arrivals, ilabi na nga human ang Duaw Davao, ang dakbayan magsaulog na sab sa ika-40th Kadayawan Festival, ang peak season alang sa tourist arrivals sa Davao.
Sayo niini, ang Davao City Police Office (DCPO) nagpahibalo nga magpakatag sila og mga 2,000 ka mga pulis aron pagseguro nga luwas ug hapsay ang mahitabong ikaduhang edisyon sa Duaw Davao, nga molungtad gikan Hunyo 5 hangtud 29, 2025.
Gipahibalo sab sa CTOO ang duha ka bag-ong kalihukan alang sa Duaw Davao: “Definitely Davao: Tsokolate ug Kape Crawl” ug ang “Definitely Davao City Tour,” nga pulos ilunsad sa Hunyo 5. Ang mas gipaabot nga Reyna ng Davao pageant ug pride parade mobalik na sab, selebrasyon sa LGBTQIA+ community.
Ang Davao City nagpasiugda og mga dagkong kalihukan sa tibuok tuig: Araw ng Dabaw sa unang kuwarter, Duaw Davao sunod bulan, ang Kadayawan Festival, ug Pasko Fiesta. (Rojean Grace G. Patumbon)