GIBUTYAG sa Civil Aviation Authority of the Philippines (Caap) nga nakasinati na sila og pagdasok sa mga pasahero sa Davao City International Airport (DCIA) tungod sa taliabot nga Semana Santa.
Si Engr. Rex Obscena, manedyer sa Caap, nagbutyag nga ang ihap sa mga pasahero sa tugpahanan nagtaas, ug kini maoy kasagaran nga mahitabo kung dunay mga espesyal nga okasyon sama sa Semana Santa.
“Gina-expect nga modaghan pa gyud ni in the coming days going towards Maundy Thursday and Good Friday,” pagseguo niya atol sa paghinabi kaniya sa Davao City Disaster Radio (DCDR), Abril 10, 2025.
Sumala ni Obscena nga ang operasyon sa tugpahanan normal lang ug nangayo na sila og "augmentation" sa seguridad sa airport. Tug-an sab niya nga gawas sa mga pulis, duna say mga miyembro sa Civil Security Unit (CSU) ug Task Force Davao (TFD).
Kahinumdoman nga samtang nagkaduol ang Semana Santa, mga awtoridad magpakusog sa ilang seguridad sa tibuok Davao City, ilabi na sa mga lugar nga daghan og tawo. Sumala sa Public Safety and Security Office (PSSO) nga ila nang gidugangan ang ilang mga personahe nga gipakatag gikan 500 hangtud 700, nga nisumada na ngadto sa kinatibuk-ang 3,000.
Si Angel Sumagaysay, PSSO chief, nagkanayon niadtong Abril 4, 2025, nga dili lang sila motutok sa mga lugar nga dunay kalihukan apan sa mga tourist destinations sama sa kadagatan ug resorts.
Dugang pa niya nga 200 security cameras sa tibuok terminal magamit na, ug gitumong sa pagmonitor sa mga kadudahan kalihukan ug pagsuporta sa rapid response operations. Mga awtoridad naglaum nga maong mga pamaagi makakubos sa kriminalidad atol sa Semena Santa.
Dugang pa, ngadto sa terminal, ipahimutang sab ang mga security teams sa mga dagkong mga simbahan ug hilit nga mga lugar sama sa Calinan ug Marilog, human ang pormal nga hangyo gikan kang Arsobispo Romulo Valles, DD.
Mga kalihukan atol sa Holy Week maglakip sa Misa ug Bisita Iglesia sa Abril 17, Estasyon sa Krus sa Abril 18, Easter Vigil sa Abril 19, ug mga misa sa Easter Sunday sa Abril 20.
Ang Semana Santa maoy usa ka relihiyusong pag-obserba sa mga Katoliko sa Pilipinas. Magsugod kini sa Dominggo sa Lukay ugma, Abril 13, hangtud sa Dominggo sa Pagkabanhaw, Abril 20, 2025. (Rojean Grace G. Patumbon)