GIPAHIBALO sa Philippine Statistics Authority (PSA) nga ang inflation rate sa Bangsamoro Region nitiurok sa -1.6 porsiyento Mayo 2025 gikan sa -1.4 porsiyento sa Abril 2025, nagtimaan sa labing ubos sa nasud.
Ang inflation rate sa tibuok Pilipinas mikunhod usab ngadto sa 1.3 porsiyento karong bulana, Hunyo, gikan sa 1.4 porsiyento sa Abril 2025.
Si Edward Donald Eloja, PSA-Barmm chief statistical specialist, nipasangil sa pagkunhod sa inflation rate (deflation) sa rehiyon ngadto sa tulo ka dagkong mga contributors, sama sa pagkunhod sa gasto sa pabalay, tubig, kuryente, gas; transportasyon; ug personal nga pag-atiman ug lain-laing mga butang ug mga serbisyo.
Iyang gitumbok nga ang nag-unang lima (5) ka mga palaliton nga nakatampo sa deflation rate karong buwana naglakip sa bugas, gasolina, kuryente, ready-made nga pagkaon ug uban pang produkto sa pagkaon, ug sugar confectionery ug desserts.
"Negative inflation—deflation—in the Bangsamoro region has provided temporary relief to consumers by increasing their purchasing power,” sigun ni Eloja.
Gipasabot niya ang gikinahanglang mga lakang sa interim government nga maminusan ang negatibong epekto sa ekonomiya sa rehiyon, lakip ang pagsuporta sa lokal nga produksiyon, pagkunhod sa buhis sa mga kinahanglanon nga palaliton, paghatag og subsidy sa mga sektor nga naapektuhan sa pagtaas sa mga presyo, ug pagdasig sa dugang nga pamuhonan.
Sa Bangsamoro Region, ang Basilan nakatala sa labing taas nga deflation rate sa -3.4 porsiyento, gisundan sa Maguindanao sa -2.4 porsiyento, Tawi-Tawi sa -1.7 porsiyento, ug Lanao del Sur sa labing ubos nga deflation rate sa -0.2 porsiyento. (Edgar E. Fuerzas)