GITAHO sa Davao City Fire District (DCFD) ang pagkubos sa insidente sa mga sunog sa dakbayan, gikan 400 ka mga kaso sa 2024 niubos kini ngadto sa 300 sa 2025.
Gikanayon ni Russell Jake Marañon, hepe sa Public Information Unit sa DCFD, nga gikan Enero hangtud Hunyo 2025, dunay natala nga 340 ka mga insidente sa sunog nga mas ubos sa 496 ka insidente nga natala sa samang panahon niadtong 2024.
“Adunay pagbaba sa atong [There is a decrease into fire incidents by] 31.45 percent,” tug-an niya atol sa ISpeak media forum, Huwebes, Hulyo 17, 2025, sa City Mayor’s Office (CMO).
Gikanayon ni Marañon nga kasagaran sa insidente sa sunog giklasipikar isip "non-structural", kasagaran rason ang pagbag-o sa kondisyon sa panahon. Kini naglakip sa mga sunog nga naglambigit sa poste sa kuryente, basura, ug mga sagbot. Giesplikar sab niya nga ang ihap sa "structural fires" nga naglambigit sa mga gambalay niubos itandi sa 2024.
Gitampo niini ang pag-ubos ngadto sa mas epektibo nga information dissemination sa lokal nga mga komunidad pinaagi sa mga programa sama sa barangayan ug balay-balay nga kampanya.
Dugang pa, iyang gipahimug-atan nga ang istrikto nga implementasyon sa Fire Code sa mga business establishments, uban ang paglambo sa pagtuman ug pagsunod gikan sa mga tag-iya og patigayon, nakatampo ngadto sa pagkubos sa ihap sa insidente sa sunog sa mga komersiyal nga gambalay.
Nagpadayag og pasalamat si Marañon sa maong pag-ubos ug nagsulti nga ang DCFD naningkamot nga makubsan pa ang mga insidente sa sunog sa ikaduhang tunga sa 2025.
Iya sab nga gitambagan ang mga tag-iya og mga balay nga likayan ang paggamit og substandard extension wires ug kanunayon ang pagsusi sa ilang wiring systems sa balay. Daghang mga kuryente, matud niya, nadaut na tungod sa kadugayon o ba kaha gikitkit sa mga ilaga.
Dugang pa, iyang giawhag ang mga molupyo nga di mohimo og "DIY electrical" nga trabaho. Inay, iyang girekomendar ang pagkuha og lisensiyadong propesyonal nga elektrisyan nga maoy mohimo sa wiring installations aron nga makubsan ang risgo sa sunog.
Kasamtangan, gipalihok sa DCFD ang 15 ka mga fire stations sa tibuok dakbayan ug nagplano nga magdugang og pito pa ka substations aron nga mas makaserbisyo pa og maayo sa halapad nga lugar sa Davao City. (Rojean Grace G. Patumbon)