KINATIBUK-ANG 541 ka mga safety and security personnel gikan sa Davao Region ang ipakatag sa Bangsamoro Autonomous Region in Muslim Mindanao (Barmm) alang sa 2025 National and Local Elections (NLE).
Sa 541 ka personahe, 500 niini gikan sa Police Regional Office-Davao Region (PRO-Davao) ug 41 gikan sa maritime units, kinsa magserbi isip miyembro sa Special Electoral Board.
Gihimo ang send-off ceremony alang sa Multi-Agency Security Forces and Special Electoral Boards (SEB) Miyerkules sa buntag, Abril 30, 2025, sa Camp Sgt. Quintin Merecido sa Buhangin, Davao City.
Gikanayon ni Police Brigadier General Leon Victor Z. Rosete, regional director sa PRO-Davao, nga mga security forces andam nga depensahan ang integridad sa prosesong demokrasya. Gipahimug-atan niini ang kabililhon sa makiangayon nga eleksyon ug ang misyon sa matag personahe tataw kaayo: iseguro nga matag molupyo makahimo sa ilang katungod sa pagbotar nga way kahadlok o panghulga.
“PNP personnel meticulously secure polling places, control access, and prevent any unauthorized entry. They will work tirelessly to maintain peace and order, manage crowds and resolve disputes peacefully,” matud niya.
Sulti ni Atty. Michael C. Abas, regional director sa Commission on Elections-Davao, nga ang pagpakatag sa 541 ka personahe ngadto sa Barmm usa ka "constitutionally mandated effort" aron nga bantayan ang katungod nga mobotar ug panalipdan ang integridad sa electoral nga proseso ilabi na sa mga lugar nga duna nay kasinatian sa mga komplikto panahon sa eleksyon.
“Ang inyong papel ay hindi lamang para tiyakin ang kaayusan at seguridad, kayo rin po ang magiging katuwang ng komisyon sa pagbibigay ng pantay at malinis na halalan sa bawat Pilipino saan man dako ng bansa,” pagpasabot niya.
Gibutyag ni Abas nga 807 ka pulis gikan sa PRO-Davao gibansay isip mga miyembro sa electoral board, ug 500 kanila ipakatag sa Barmm. Matud niya nga kining mga pulis andam nga magserbi isip miyembro sa electoral board sa panahon nga magkuwang ang mga magtutudlo.
Tumbok niya nga sa milabay nga mga kaso, sama sa Cotabato City, kon diin pipila ka mga electoral board members nisibog sa adlaw sa eleksiyon, nagpahimug-at sa panginahanglan sa pulis nga mohimo sa maong tahas kung gikinahanglan. Iyang gitin-aw nga mga pulis nga gi-asayn isip electoral board members sa Barmm dili gikan sa rehiyon.
Gibutyag sab ni Rosete nga ang kinatibuk-ang 12,168 safety and security personnel gipakatag sa tibuok rehiyon alang sa 2025 NLE. Sa maong ihap, 1,557 gikan sa 10th Infantry Division, 184 gikan sa Coast Guard District Southeastern Mindanao (CGDSEM), 195 gikan sa Bureau of Fire Protection, ug 10,232 gikan sa PRO-Davao. (Rojean Grace G. Patumbon)